२८ सय किलोमिटर सडक स्तरोन्नति गर्ने सरकारको योजना

काठमाडौं । सरकारले आगामी तीन वर्षभित्र करिब ११ खर्ब ५० अर्ब रुपैयाँबराबरका पूर्वाधार आयोजना अघि बढाउने योजना सार्वजनिक गरेको छ । बजेटमाथि उठेका प्रश्नहरूको जवाफ दिने क्रममा भौतिक पूर्वाधार तथा यातायातमन्त्री सुनिल लम्सालले सडक, पुल, खानेपानी, सहरी विकास र खेलकुद पूर्वाधारलाई समेट्ने बहुवर्षीय योजना कार्यान्वयनमा जाने बताएका हुन् ।

मन्त्रीका अनुसार, बजेट पुस्तिकामा चालु आर्थिक वर्षका लागि दुई खर्ब ८६ अर्ब रुपैयाँ मात्र देखिए पनि बहुवर्षीय आयोजना समेट्दा करिब ११ खर्ब ५० अर्ब रुपैयाँबराबरका ठेक्का खुल्नेछन् । खरिद प्रक्रिया छोट्याएर १८–२१ महिनाबाट ६–७ महिनामा सीमित गर्ने लक्ष्यसमेत सरकारले लिएको छ ।

सडक सुरक्षालाई उच्च प्राथमिकतामा राख्दै सरकारले तीन वर्षका लागि चार अर्ब ७४ करोड रुपैयाँ विनियोजन गरेको छ । त्यस्तै, जिल्ला सदरमुकाम जोड्ने एक लेन सडकलाई तीन वर्षभित्र दुई लेनमा स्तरोन्नति गर्न ११ अर्ब रुपैयाँ छुट्याइएको छ । पहिरो जोखिम क्षेत्रमा संरक्षणका कामका लागि २३ अर्ब रुपैयाँ विनियोजन गरिएको छ ।

सरकारले तीन हजार स्थानीय पुल निर्माण गर्ने महत्त्वाकांक्षी योजना पनि अघि सारेको लम्सालले जानकारी दिए । खोला, खोल्सी तथा जोखिमयुक्त स्थानमा दुर्घटना न्यूनीकरण गर्न तीन वर्षे योजनाअन्तर्गत ८१ अर्ब २२ करोड रुपैयाँ खर्च गरिने भएको छ ।

सबै पालिका केन्द्रलाई सडक सञ्जालसँग जोड्ने लक्ष्यसहित तीन वर्षमा दुई हजार ८ सय किलोमिटर सडक निर्माण तथा स्तरोन्नतिका लागि ६३ अर्ब रुपैयाँ विनियोजन गरिएको छ । त्यस्तै, सबै वडा केन्द्र जोड्ने कार्यक्रमका लागि २८ अर्ब ५० करोड रुपैयाँ छुट्याइएको छ ।

सहरी क्षेत्रमा करिब ३०० बजार व्यवस्थित गर्न ‘सघन सहरी कार्यक्रम’ अन्तर्गत ८८ अर्ब ३३ करोड रुपैयाँ र बस्ती विकास कार्यक्रमका लागि ५७ अर्ब ७१ करोड रुपैयाँ विनियोजन गरिएको मन्त्रीले जानकारी दिए ।

सांसदहरूले माग गरेका सडक तथा पुल आयोजनालाई समेत समेटिएको लम्सालले जानकारी दिए । वैकल्पिक सहायक राजमार्गका लागि ४४ अर्ब ४० करोड, निर्वाचन क्षेत्र रणनीतिक सडकका लागि २६ अर्ब चार करोड, कृषि सडकका लागि १० अर्ब ५० करोड तथा स्थानीय पर्यटकीय सडकका लागि १० अर्ब ५० करोड रुपैयाँ विनियोजन गरिएको छ ।

सरकारले व्यापारिक र पर्यटकीय राजमार्गलाई समेत प्राथमिकतामा राखेको छ । रानी–विराटनगर–किमाथांका, वीरगञ्ज–रसुवागढी, भैरहवा–कोरला, कोइलाबास–डोल्पा तथा पूर्व–पश्चिम पर्यटकीय राजमार्गलगायत आठ प्रमुख करिडोरमा करिब तीन हजार किलोमिटर सडक निर्माणका लागि ६ खर्ब रुपैयाँ लगानीको योजना रहेको मन्त्रीले बताए ।

खानेपानीतर्फ तीन वर्षभित्र ६५ प्रतिशत र पाँच वर्षभित्र ९० प्रतिशत जनसंख्यालाई शुद्ध खानेपानीको पहुँचमा पुर्‍याउने लक्ष्य सरकारले लिएको छ । निर्माण सम्पन्न भइसकेका सबै ओभरहेड ट्यांकीमा पाइप बिछ्याउने काम यही वर्ष सक्ने प्रतिबद्धता पनि जनाइएको छ ।

खेलकुद पूर्वाधार विस्तारअन्तर्गत आठ हजार दर्शक क्षमताका १० फुटबल रंगशाला निर्माणका लागि पाँच अर्ब विनियोजन गरिएको छ । आठवटा क्रिकेट रंगशालाका लागि चार अर्ब तथा सातवटा इन्डोर स्टेडियम निर्माणका लागि तीन अर्ब ५० करोड रुपैयाँ विनियोजन गरिएको मन्त्री लम्सालले जानकारी दिए ।

#सरकार