नक्कली वाकिटकीसहित प्रहरी हुँ भन्दै धम्क्याउने एकजना पक्राउ

नक्कली वाकिटकीसहित प्रहरी हुँ भन्दै धम्क्याउने एकजना पक्राउ परेका छन् ।

पक्राउ पर्नेमा काठमाडौं महानगरपालिका–३ का ४७ वर्षीय शैलेश डंगोल छन् । जिल्ला प्रहरी परिसर काठमाडौंका अनुसार काठमाडौं महानगरपालिका–३२ स्थित फुटबल ग्राउण्ड क्षेत्रमा एक व्यक्तिले वाकी–टाकी देखाउँदै ‘म प्रहरी हुँ’ भन्दै धम्की दिएको सूचना प्राप्त भएपछि प्रहरी टोली खटिएको थियो।

प्रहरीले डंगोलको साथबाट एक थान वाकीटकी सेट, एक थान ब्लुबुक तथा सूचना तथा प्रसारण विभागबाट जारी गरिएको तर नवीकरण नभएको पत्रकार परिचयपत्र बरामद गरेको जनाएको छ।

प्रारम्भिक अनुसन्धानमा वाकीटकी प्रयोगका लागि अनुमति लिएको देखिए पनि उक्त उपकरण प्रयोग गरी प्रहरीको परिचय दिएर धाकधम्की दिएको आरोपमा थप अनुसन्धान भइरहेको प्रहरीले जनाएको छ।

यस घटनामा थप अनुसन्धानका लागि काठमाडौं जिल्ला अदालतबाट पाँच दिनको म्याद थप अनुमति लिई प्रहरी वृत्त नयाँ बानेश्वरमार्फत अनुसन्धान प्रक्रिया अगाडि बढाइएको जिल्ला प्रहरी परिसर काठमाडौंले जनाएको छ।