सधैं कमजोर श्रम कूटनीति

विदेशमा बसेर पसिनासँग पैसा साटेर पठाइरहेका युवाकै भरले नेपालको अर्थतन्त्रलाई टेको दिएको छ। तर रेमिट्यान्स पठाउने युवाका बग्रेल्ती कठिनाइ र सास्ती भने सरकार सुनेको नसुन्यै गर्छ। उनीहरूमाथि नै शोषण र ठगी मौलाएको छ। तिनका समस्या हल गर्नपट्टि सरकार लाग्दैन।

श्रम गन्तव्य मुलुकमै हुनसम्मका दुःख र हन्डरका कथा अनेक छन्। पासपोर्ट लिनेदेखि श्रमस्वीकृति पाउँदासम्म स्वदेशमै उनीहरूका पाइलामा ठक्कर लाग्न सुरु हुन्छ। स्वदेशमै दुःख नदेख्ने सरकार छ। संवेदनहीन बनिरहने सरकारका प्रतिनिधिका रूपमा हुने दूतावासले विदेशको भव्यताभित्र के देख्नु ! कूटनीतिक निकायका तिनै प्रतिनिधि नै बरु ‘म्यानपावर कम्पनी’का बिचौलियाको भूमिका देखा पर्ने आरोप लाग्छ। कति त त्यस्तै धन्दामा पो खुलेआम संलग्न हुन्छन््। यसमा दूतका नाममा कूटनीतिको ‘क’ नजान्नेहरूलाई नियुक्त गर्ने सरकार नै मुख्य दोषी हो।