दुर्घटनामा परेको विमानका पाइलटले भने– १०० फिट माथि पुगेपछि कन्ट्रोल नै गर्न सकिनँ

गत बुधबार बिहान दुर्घटनामा परेको सौर्य एयरलाइन्सको जहाजका चालक मनीषरत्न शाक्यले विमान दुर्घटनामा पर्नुको कारणबारे सामान्य जानकारी दिएका छन् । काठमाडौं मेडिकल कलेजमा उपचाररत शाक्यले धावनमार्गबाट केही माथि उडेपछि आफूले जहाज नियन्त्रण गर्न नसक्दा विमान दुर्घटनामा परेको बताएका छन् ।

उक्त अस्पतालकी निर्देशक प्रा.डा. मीना थापासँग सामान्य कुराकानी गर्दै उनले करिब १०० फिट जति माथि पुगेपछि आफूले कन्ट्रोल नै गर्न नसकेको बताएका हुन् । त्यसपछि केहीले थिचिएको जस्तो भएको र बाँकी के भयो भन्नेबारे धेरै याद नरहेको बताएका हुन् ।