कृति विमोचनसँगै गायिका ज्ञानु राणाको सम्मान

काठमाडौं । जरा फाउन्डेसन नेपाल र शान्ति साहित्य परिषद्ले एक कार्यक्रमको आयोजना गर्दै अग्रज गायिका ज्ञानु राणालाई सम्मानित गरेको छ ।

कार्यक्रममा फाउन्डेसनका अध्यक्ष कवि साहित्यकार कृष्ण प्रसाईं र परिषद्का कृष्ण अधिकारीले सम्मानित गरे ।

उक्त अवसरमा कवि गजलकार सावित्री गिरी सुकुको गजलकृति ‘छालहरू ओढेर’ लोकार्पित गरियो । लोकार्पित गजल कृतिभित्रबाट कविहरू समाश्री, सुमित्रा सुमी, दिया गिरी, नानीबाबा अधिकारी र कृतिकार गिरीले गजलहरू वाचन गरे ।

सोही अवसरमा इम्तियाज वफा, देवेन्द्र केसी देवु, मुमताज अन्जुम, तबस्सुम मिकरानी, बिटु केसी, फुरकान फैज, शीतल कादम्बिनी र जुनु अधिकारीले नेपाली, हिन्दी र उर्दु भाषाका गजल वाचन गरे ।

कार्यक्रममा अग्रज गायिका राणाले यो सम्मानबाट आफू उत्साहित भएको बताउँदै १४ वर्षको उमेरबाट गीत गाउन सुरु गरेको स्मरण गरिन् । उनले आफ्नो पिताजी जनकवि केशरी धर्मराज थापाले देखाएको बाटोमा हिँडेर यहाँसम्म आइपुगेको बताइन् ।

उनले ‘मान्छेको माया यहाँ...’ गीतसँगै उर्दु गजल एलबम ‘खुश्वुका सफर’बाट एउटा गजल गाइन् ।

सार्वजनिक गजलकृतिमाथि सुधीर ख्वबिले पाठकीय टिप्पणी राख्दै गजलको प्रवृत्तिगत चर्चा गरे । उनले सुधारका केही पाटामा ध्यान दिनुपर्ने बताए ।

उक्त अवसरमा प्रसाईं, अधिकारी र कवि प्रज्वल अधिकारीले फाउन्डेसनका बारेमा बोलेका थिए ।

#ज्ञानु राणा

#जरा फाउन्डेसन नेपाल