छानबिन मुख्य नाइकेसम्म पुग्नुपर्छ

राजस्व अनुसन्धान विभागले बरामद गरेको एक सय किलो सुनको निष्पक्ष छानबिन होला कि नहोला भन्ने सर्वसाधारणमाझ आशंका छाएको छ । सर्वसाधारण जनताको यो आशंका निराधार भने होइन । अहिलेसम्म जे–जति सुन तस्करी भयो, त्यसमा सुन ओसारपसार गर्ने भरिया मात्र पक्राउ हुने अनि पछि यो केस त्यसै सेलाएर जाने गरेको छ । यस पृष्ठभूमिमा सर्वसाधारणको आशंका स्वाभाविक र जायज पनि रहेको छ । त्यसैले यो तस्करीको मुख्य नाइकेलाई पत्ता लगाएर कडाभन्दा कडा कारबाही गर्न राज्यले कुनै किसिमको सम्झौता गर्नुहुँदैन ।

सय किलो सुनको मूल्य ठूलै हुने भएकोले राज्य संयन्त्रबीच सेटिङ नगरी ल्याइएको हो भन्न कठिन छ । राज्य संयन्त्रको मिलेमतो नभई यत्रो सुन तस्करी हुनै सक्दैन । यसमा राजनीतिक तहको नेतृत्वकर्ता पनि संलग्न भएको हुन सक्छ । त्यसैले यो गम्भीर र संगठित अपराध हो । यस्तो अपराधको अनुसन्धान पनि गम्भीर ढंगले गरिनुपर्छ, ताकि यसको जरोसम्म पुग्न सकियोस् ।