लिग विजेता चर्च ब्वाइज झापा कपको फाइनलमा

इलाम । लिग विजेता चर्च ब्वाइज युनाइटेड झापाको बिर्तामोडमा आयोजित झापा कपको फाइनलमा प्रवेश गरेको छ । डोमललाल रंगशालामा शुक्रबार भएको खेलमा सिरहाको सलहेश युवा क्लबमाथि १–० को कठिन जित हात पार्दै फाइनल प्रवेश गरेको हो । चर्च ब्वाईज इलाम गोल्डकपको उपविजेता हो ।

चर्च ब्वाइजले जितसँगै कम्तिमा ५ लाख रुपैयाँ पुरस्कार सुरक्षित गरेको छ । चर्च ब्वाइजको जितका लागि खेलको ८१ औँ मिनेटमा विदेशी खेलाडी अर्मन्डको एक मात्र गोलले फाइनल प्रवेशको यात्रा तय गर्यो । सलहेशका दुई डिफेन्डरलाई बिट गर्दै अर्मन्डले दायाँ बार च्यापेर गरेको प्रहारले जाली चुमेको थियो । चर्च ब्वाइज अनन्त तामाङ, मनिष जर्घा मगर र एरिक विष्टबिनै मैदानमा उत्रिएको चर्च सलहेशको चर्काे दबाबमा परेको थियो ।