पोखरा विश्वविद्यालयले ल्यायो एआई र डेटा साइन्समा नयाँ ब्याचलर कोर्स, ९ विद्यार्थीलाई पूर्ण छात्रवृत्ति

काठमाडौं । नेपालमा कृत्रिम बुद्धिमत्ता (एआई) र डेटा साइन्स क्षेत्रमा दक्ष जनशक्ति उत्पादन गर्ने उद्देश्यसहित पोखरा विश्वविद्यालयले नयाँ स्नातक तहको कार्यक्रम सञ्चालनमा ल्याएको छ । विश्वविद्यालयको ललितपुरस्थित आङ्गिक क्याम्पस श्रमिक शान्ति क्याम्पसले ब्याचलर अफ एआई एन्ड डेटा साइन्स (BAIDS) कार्यक्रमका लागि आवेदन खुला गरेको हो ।

विश्वविद्यालयका अनुसार चार वर्ष (आठ सेमेस्टर) अवधिको यो कार्यक्रम नेपालमै पहिलोपटक सञ्चालनमा ल्याइएको दाबी गरिएको छ । पहिलो शैक्षिक सत्रका लागि ४८ विद्यार्थी भर्ना गरिनेछ । तीमध्ये आर्थिक रूपमा विपन्न तथा जेहेनदार ९ जना विद्यार्थीले पूर्ण छात्रवृत्तिमा अध्ययन गर्ने अवसर पाउनेछन् ।