चीनले बनायो एक थोपा रगतबाट क्यान्सरको लक्षण चिन्नसक्ने हाते उपकरण

चिनियाँ वैज्ञानिकहरूले रगतको एक थोपाबाटै फोक्सोको क्यान्सरको प्रारम्भिक लक्षण पत्ता लगाउने एउटा सानो हाते उपकरण (ह्यान्ड-हेल्ड डिभाइस) बनाएका छन्। यो प्रविधिलाई क्यान्सरको प्रारम्भिक पहिचान र समयमै उपचारका लागि एउटा ठूलो सफलता मानिएको छ।

सामान्यतया क्यान्सर परीक्षणका लागि ठूला र भारी उपकरणहरूको आवश्यकता पर्छ। यसले गर्दा यस्ता परीक्षणहरू अस्पताल वा ठूला अनुसन्धान प्रयोगशालाहरूमा मात्र सीमित हुने गर्छन्। ती ठूला उपकरणहरूले प्रकाशको तरङ्ग लम्बाइमा आउने सूक्ष्म परिवर्तनहरूलाई मापन गरेर रोगको पहिचान गर्छन्। तर त्यस्ता परिवर्तनहरू पत्ता लगाउन निकै संवेदनशील र ठूला पार्टपुर्जाहरू चाहिन्छ।