घरमै राहदानी पाउँदा समय र खर्च दुवैको बचत

कालीगण्डकी गाउँपालिकाबाट सदरमुकाम तम्घासमा राहदानी बनाउन र लिन जाँदा झण्डै १० हजार रुपियाँ खर्च हुने गर्दथ्यो । तर नेपाल सरकारले हुलाकमार्फत घरमै राहदानी पठाउने व्यवस्था गरेपछि करिब पाँच हजार रुपियाँ तथा समय दुवै बचत भएको सेवाग्राहीहरूले बताएका छन् ।

सदरमुकाम तम्घासबाट भौगोलिक रूपमा विकट रहेको यस क्षेत्रमा नियमित सवारीसाधन नचल्ने र बीचबाटोमा गाडी फेर्नुपर्ने भएकाले बढी समय र खर्च लाग्ने गरेको छ । कालीगण्डकी गाउँपालिका–७ भुर्तुङका कमला लुइटेलसहित १६ जनाको राहदानी हुलाकमार्फत घरमै प्राप्त भएपछि ठुलो राहत मिलेको उनीहरूले बताएका छन् ।

गाडी नै रिजर्भ गरेर जाँदा एकतर्फी नै १० हजार रुपियाँसम्म तिर्नुपर्ने बाध्यताबाट राहत मिलेको उनीहरूको भनाइ छ ।

वडा नं. १ गिदुवाका केशर नेपालीले घरमै राहदानी पाउने व्यवस्था निकै सहज र खुशीको विषय भएको बताउनुभयो । उहाँका अनुसार राहदानी लिन तम्घास जानु नपर्दा समय र पैसा दुवै बचत भएको छ । “सरकारले घरमै सेवा दिने निर्णय कार्यान्वयन गरेपछि सरकार भएको अनुभूति भएको छ,” उहाँले भन्नुभयो ।

गत वर्ष गाउँपालिकाबाट सदरमुकाम तम्घास राहदानी बनाउन जाँदा टोकन नपाएको भन्दै गाउँपालिका अध्यक्ष वेदबहादुर थापाले राहदानी शाखाको स्क्यानर नै फुटाइदिनुभएको घटना समेत भएको थियो ।

जिल्ला हुलाक कार्यालयका अनुसार हुलाक सेवा विभागमार्फत सञ्चालन गरिएको ‘घरमै राहदानी वितरण सेवा’ अन्तर्गत रेसुङ्गा नगरपालिकामा ५१ जना, गुल्मीदरबार गाउँपालिकामा ६ जना, मुसिकोट नगरपालिकामा १३२ जना, मदाने गाउँपालिकामा १२ जना र कालीगण्डकी गाउँपालिकामा २१ जनाले सेवा प्राप्त गरेका छन् ।

रेसुङ्गा नगरपालिकाबाट सुरु भएको यो अभियान जिल्लाका चार स्थानीय तहमा विस्तार भइसकेको प्रमुख जिल्ला अधिकारी बद्रीनाथ गैह्रेले बताउनुभयो । नागरिकलाई सहज रूपमा सरकारी सेवा उपलब्ध गराउने उद्देश्यले सेवा विस्तार गरिएको उहाँको भनाइ छ ।

प्रमुख जिल्ला अधिकारी गैह्रेले ग्रामीण भेगका नागरिकलाई लक्षित गर्दै सेवा थप प्रभावकारी बनाइने र आगामी दिनमा जिल्लाका अन्य स्थानीय तहमा समेत विस्तार गरिने बताउनुभयो । सरकारी सेवा प्रवाहलाई प्रविधिमैत्री र नागरिकमैत्री बनाउने अभियान निरन्तर जारी रहने प्रशासनले जनाएको छ ।