बिमा दाबी भुक्तानीमा ‘इनपुट भ्याट क्रेडिट’को मागः कर चुहावट रोकिने, पारदर्शिता बढ्ने

काठमाडौं । निर्जीवन बिमा कम्पनीहरूले आगामी आर्थिक वर्षको बजेटमार्फत बिमा दाबी भुक्तानीमा लाग्ने मूल्य अभिवृद्धि कर (भ्याट) समायोजन गर्नुपर्ने आवाज उठाइरहेका छन् । बिमा कम्पनीहरूले दाबी भुक्तानीका क्रममा मर्मत खर्चमा तिरेको भ्याटलाई ‘इनपुट भ्याट क्रेडिट’का रूपमा समायोजन गर्न पाउनुपर्ने उल्लेख गर्दै भ्याट समायोजनको विषय उठाएका हुन् ।

नेपालमा ‘इनपुट भ्याट क्रेडिट’ भन्नाले व्यवसायले खरिद गर्दा तिरेको भ्याटलाई बिक्रीमा उठेको भ्याट (आउटपुट भ्याट)बाट घटाएर बाँकी रकम मात्र सरकारलाई बुझाउने व्यवस्था हो । भ्याटमा दर्ता भएको व्यवसायले सामान वा सेवा खरिद गर्दा तिरेको भ्याटलाई बिक्रीमा उठेको भ्याटबाट घटाउने अधिकारले इनपुट भ्याट क्रेडिटलाई जनाउने गर्दछ ।