ह्याट्रिकपछि रोएका मेसीको पीडा- पिता जर्ज अस्पताल भर्ना

अर्जेन्टिनी फुटबल स्टार लियोनल मेसीका पिता जर्ज मेसी अहिले स्वास्थ्य समस्याबाट गुज्रिरहेका छन् । विश्वकप २०२६ मा अर्जेन्टिनाको शानदार शुरूआत र मेसीको ऐतिहासिक ह्याट्रिकको चर्चाबीच यो पारिवारिक खबर सार्वजनिक भएको हो ।

उनको परिवारले बिहीबार जारी गरेको एक विज्ञप्तिमा अनुसार उनी अहिले चिकित्सकको निगरानीमा छन् । 'अहिले उहाँ चिकित्सकहरूको रेखदेखमा हुनुहुन्छ। उहाँको स्वास्थ्यमा सुधार भइरहेको छ र अवस्था सकारात्मक दिशातिर अघि बढिरहेको छ,' विज्ञप्तिमा भनिएको छ ।

संवेदनशील घडीमा मेसी परिवारले मिडिया र सर्वसाधारणलाई कुनै पनि किसिमका अड्कलबाजी, अफवाह र अनुमानबाट टाढा रहन र आफ्नो गोपनीयताको सम्मान गर्न आग्रह गरेको छ। 'यस्तो समयमा हामी सबैबाट जिम्मेवारी, विवेक र मानवताको अपेक्षा गर्दछौँ। कुनै पनि व्यक्तिको स्वास्थ्य र उनको वरपरका मानिसहरूको मानसिक शान्तिलाई लिएर अड्कलबाजी गरिनु वा गैरजिम्मेवार मिडिया चासोको विषय बनाइनु हुँदैन,' विज्ञप्तिमा अगाडि भनिएको छ, 'हामीले पाइरहेको माया, सम्मान र चिन्ताका लागि हृदयदेखि नै धन्यवाद ज्ञापन गर्दछौँ। यस प्रक्रियाका क्रममा जर्ज र पूरा परिवारको गोपनीयता एवं गोपनीयताको रक्षा गरिदिनुहुन अनुरोध छ।'

यसअघि मंगलबार अल्जेरियाविरुद्धको खेलपछि आयोजित पत्रकार सम्मेलनमा मेसी आफैँले पनि आफू भावुक भएको र पहिलो गोल गरेपछि रोएको खुलासा गरेका थिए। त्यस क्रममा उनले आफूले केही कठिन दिनहरू सामना गरिरहेको बताएका थिए। 'फुटबलसँग पूर्ण रूपमा असम्बन्धित कारणहरूले गर्दा मैले केही कठिन र जटिल दिनहरू पार गर्नु परेको थियो। म पूरा टोली र मेरा सबै साथीहरूलाई धन्यवाद दिन चाहन्छु, किनभने उनीहरू सधैँ झैँ मेरो साथमा उभिए र मलाई बलियो बन्न धेरै शक्ति दिए,' मेसीले पत्रकार सम्मेलनमा भनेका थिए ।

यो पारिवारिक स्वास्थ्य सङ्कटको खबर अर्जेन्टिनाले विश्वकप २०२६ मा विजयी शुरूआत गरेको दुई दिनपछि बाहिर आएको हो। साविक विजेता अर्जेन्टिना लगातार दोस्रो पटक विश्वकपको उपाधि जित्ने लक्ष्यका साथ मैदानमा उत्रिएको छ।

अल्जेरियाविरुद्धको पहिलो खेलमा अर्जेन्टिनालाई ३–० को जित दिलाउने क्रममा कप्तान मेसीले खेलका तीनै गोल गर्दै सानदार ह्याट्रिक गरेका थिए। ऐतिहासिक प्रदर्शनसँगै मेसीको विश्वकप इतिहासमा कुल गोल सङ्ख्या १६ पुगेको छ र उनले विश्वकपमा सबैभन्दा बढी गोल गर्ने जर्मनीका मिरोस्लाव क्लोजको कीर्तिमानसँग बराबरी गरेका छन्।

आगामी जुन २४ मा ३९ वर्ष पुग्न लागेका मेसी आफ्नो छैटौँ विश्वकप खेलिरहेका छन्। यसअघि सन् २०२२ को कतार विश्वकपमा उनले फ्रान्सलाई पराजित गर्दै अर्जेन्टिनालाई विश्वविजेता बनाएका थिए।