बालविवाह रोक्न कानुनी उमेरमा विवाह गर्ने छोरीलाई ५१ हजार प्रोत्साहन

महोत्तरी । मधेस प्रदेशका विभिन्न जिल्लामा बालविवाह अझै पनि सामाजिक चुनौतीका रूपमा रहँदै आएको अवस्थामा महोत्तरीको बर्दिबास नगरपालिकाले यसलाई न्यूनीकरण गर्ने उद्देश्यसहित नयाँ कार्यक्रम अघि सारेको छ। नगरपालिकाले २० वर्ष उमेर पूरा गरेपछि विवाह गर्ने छोरीलाई नगद ५१ हजार रुपैयाँ प्रोत्साहनस्वरूप प्रदान गर्ने नीति ल्याएको हो।

नगरपालिकाको १८औँ नगरसभामा आर्थिक वर्ष २०८३/८४ का लागि प्रस्तुत नीति तथा कार्यक्रम तथा बजेटमार्फत यस्तो व्यवस्था सार्वजनिक गरिएको हो। स्थानीय तहले बालविवाह नियन्त्रण र कानुनी उमेरमा विवाह गर्ने संस्कृतिलाई प्रोत्साहन गर्न आर्थिक प्रोत्साहनको उपाय रोजेको जनाएको छ।