‘भागदौड’को टिजरमा वैदेशिक रोजगारी र सहकारी ठगीको कथा

काठमाडौँ । फिल्म ‘भागदौड’को टिजर सार्वजनिक भएको छ । टिजरले वैदेशिक रोजगारीको भ्रम, फाइनान्स तथा सहकारी ठगी र मानिसहरूको जीवनमा आइपर्ने विभिन्न उतारचढावलाई समेटेको छ । प्रेम, बदला र भागदौडको रोचक सम्मिश्रण फिल्ममा देख्न सकिने टिजरबाट अनुमान गर्न सकिन्छ । टिजरमा रहेको सस्पेन्स विषयले दर्शकहरूमा फिल्म प्रति कौतुहलता जगाएको छ।

निशा श्रेष्ठ, घनश्याम जोशी, शारदा राई (डायना), विशाल पोखरेल, शिशिर चापागाईं, देशभक्त खनाल, लक्ष्मी गिरी, शंकर महर्जन र सुवास तिमिल्सिना लगायतका कलाकारहरूको मुख्य भूमिका छ ।

असार २६ (जुलाई १०) गतेबाट देशभरका प्रदर्शनमा आउने फिल्म हिमाल उप्रेतीको निर्देशन छ । विश्वराम बिष्टको प्रस्तुतकर्ता रहेको फिल्ममा अंगिरा थापा कार्यकारी निर्माता रहेका छन् भने सह–निर्माताहरू भूपेन्द्र कुमार खड्का, सागर पुरी र सुरेश गिरी हुन् ।

सुप्रिम म्यूजिक एण्ड फिल्मस प्रा. लि र नेशनल सिने ग्रुप नेपालको प्रस्तुतिमा निर्माण भएको यो फिल्मले काठमाडौँको ऐतिहासिक एवं परम्परागत नेवार बस्ती बुङ्गमती र बागमती नदी किनारको आसपासमा केन्द्रित छ । फिल्मले बुङ्गमतीको प्राचीन सभ्यता, नेवारी कला–संस्कृति, र त्यहाँ बसोबास गर्ने नेवार, बाहुन, क्षेत्री लगायतका विभिन्न समुदायबिचको सह–अस्तित्व तथा परम्परागत प्रथा र आधुनिक जीवनशैलीबिचको सन्तुलनलाई पर्दामा देखाउने फिल्मका प्रस्तुतकर्ता विश्वराम बिष्टले बताए ।

फिल्ममा दीपक बज्राचार्यको छायाङ्कन, प्रविन ढकालको सम्पादन, वसन्त सापकोटा र प्रकाश नेपालीको सङ्गीत छ ।