'साइलेन्ट स्ट्रिट' अभियानमा ७ युवा लागुऔषधसहित पक्राउ, ११ मोटरसाइकल नियन्त्रणमा

बुटवल । बुटवलका विभिन्न स्थानबाट सात जना युवा लागुऔषधसहित पक्राउ परेका छन् ।

इलाका प्रहरी कार्यालय बुटवलले सञ्चालन गरेको ‘साइलेन्ट स्ट्रिट’ अभियानअन्तर्गत बिहीबार राति उनीहरूलाई पक्राउ गरिएको हो ।

कार्यालयका प्रमुख प्रहरी नायव उपरीक्षक निसान्त श्रीवास्तवका अनुसार पक्राउ परेका युवाहरूको साथबाट गाँजा लगायतका लागुऔषध बरामद गरिएको छ । पक्राउ परेकामाथि थप अनुसन्धान भइरहेको प्रहरीले जनाएको छ ।

प्रहरीले चेकजाँचका क्रममा अन्य आठ जना युवालाई पनि नियन्त्रणमा लिएर सोधपुछ गरेको थियो । उनीहरूलाई सम्झाइबुझाइ गरी बिहीबार रातिनै छाडिएको डीएसपी श्रीवास्तवले जानकारी दिए ।

यसैबीच प्रहरीले बुटवलका विभिन्न स्थानबाट ११ वटा मोटरसाइकल नियन्त्रणमा लिएको छ । स्वरुप परिवर्तन गरी चर्को आवाज निकाल्ने तथा आवश्यक कागजात नबोकेका मोटरसाइकलहरू नियन्त्रणमा लिइएको प्रहरीले जनाएको छ ।

डीएसपी श्रीवास्तवका अनुसार नियन्त्रणमा लिइएका सवारीसाधनबारे थप अनुसन्धान गरी कानुनी कारबाही प्रक्रिया अघि बढाइनेछ ।

बिहीबार साँझ सञ्चालन गरिएको अभियानअन्तर्गत बुटवलको बदेलपोखरी, बेलबास, देविनगर, कालिकापथ, अमरपथ, सख्खानगर तथा पाल्पाको नुवाकोट र देवदहको चरङ्गे क्षेत्रमा विशेष चेकजाँच गरिएको थियो ।

प्रहरीका अनुसार पछिल्लो समय यस्ता अभियानको निरन्तरतासँगै बुटवल क्षेत्रमा चर्को आवाज निकालेर ध्वनि प्रदूषण गर्ने प्रवृत्ति घट्दै गएको छ । स्वरुप परिवर्तन गरिएका मोटरसाइकल तथा चारपाङ्ग्रे सवारीसाधनमाथि निगरानी बढाइएको प्रहरीले जनाएको छ ।

प्रहरीले सवारीसाधनको स्वरुप परिवर्तन गर्ने ग्यारेजहरूमा समेत निगरानी बढाएर आवश्यक कारबाही गर्दै आएको बताएको छ । सार्वजनिक शान्ति, सुरक्षा र सडक अनुशासन कायम गर्ने उद्देश्यले ‘साइलेन्ट स्ट्रिट’ अभियानलाई निरन्तरता दिइने इलाका प्रहरी कार्यालय बुटवलले जनाएको छ ।