रोटरी क्लब अफ बानेश्वरद्वारा स्वास्थ्य, शिक्षा र वातावरण क्षेत्रमा व्यापक सेवामूलक अभियान सञ्चालन

काठमाडौँ / रोटरी क्लब अफ बानेश्वरले स्वास्थ्य, शिक्षा, वातावरण संरक्षण तथा सामुदायिक कल्याणका क्षेत्रमा विभिन्न महत्वाकांक्षी कार्यक्रम सञ्चालन गर्दै व्यापक सेवामूलक गतिविधि सम्पन्न गरेको छ । अध्यक्ष रुपाली सरावगीको नेतृत्वमा क्लबले रोटरी इन्टरनेशनलको “Unite for Good” नारालाई आत्मसात गर्दै दुर्गम पहाडी क्षेत्रदेखि काठमाडौँ उपत्यकासम्म विभिन्न समुदायमा प्रत्यक्ष सेवा पुर्‍याएको हो ।

क्लबले २५ जनवरी २०२६ मा Kathmandu Medical College सँगको सहकार्यमा सामुदायिक स्वास्थ्य शिविर सञ्चालन गरेको थियो । शिविरमा जनरल मेडिसिन, जनरल सर्जरी, बालरोग, हाडजोर्नी, स्त्री तथा प्रसूति रोग, दन्त, आँखा तथा नाक–कान–घाँटी (ENT) सम्बन्धी सेवा उपलब्ध गराइएको थियो । साथै ECG, USG र प्रयोगशाला परीक्षणसमेत गरिएको थियो । उक्त शिविरमा ३५० भन्दा बढी व्यक्तिले सेवा लिएका थिए भने औषधि कम्पनीहरूको सहयोगमा १ लाख १४ हजार रुपैयाँ बराबरको निःशुल्क औषधि वितरण गरिएको क्लबले जनाएको छ ।