भक्तपुरमा टिपरले ठक्कर दिँदा पैदलयात्रीको मृत्यु

भक्तपुरमा टिपरको ठक्करबाट एकजना पैदलयात्रीको मृत्यु भएको छ।

सूर्यविनायक नगरपालिका-९ भाटेढिकुरमा जगातीबाट साँगातर्फ जाँदै गरेको बागमती प्रदेश ०१-००४ क १२४१ नम्बरको टिपरले ठक्कर दिँदा पैदलयात्रीको मृत्यु भएको प्रहरीले जनाएको छ।

करिब ५५ वर्षीय मृतकको अझै नाम, थर र वतन खुलेको छैन।

मंगलबार बिहान टिपरको ठक्करबाट गम्भीर घाइते भएका उनको भक्तपुर अस्पतालमा उपचारको क्रममा मृत्यु भएको हो।

टिपर चालकलाई प्रहरीले नियन्त्रणमा लिएको छ। घटनाका सम्बन्धमा थप अनुसन्धान जारी रहेको प्रहरीले जनाएको छ।