फिर्केको सुन्दरता फर्काउने प्रयास

पोखरा। पोखराका जयप्रकाश थापाको बाल्यकाल फिर्के खोलामा पौडी खेल्दै र आसपासका क्षेत्रमा रमाउँदै बित्यो। खोलामा निर्मल पानी बग्थ्यो। उनी बालसखाहरूसँग मिलेर त्यहाँ माछा मार्थे।

बालापनमा फर्किंदा उनको स्मृतिमा फिर्के खोलासँग जोडिएका थुप्रै किस्सा आउँछन्, जुन अहिले कथा जस्तै बनेको छ। जति उनी हुर्किंदै गए, यो खोला अतिक्रमणमा परेर खुम्चिँदै गयो। उमेरले ४० कटेका जयप्रकाशले छोटो अवधिमै फिर्केको स्वरूपमा ठूलो परिवर्तन देखे। केही दशकको अन्तरालमै जयप्रकाशले देख्दादेख्दै खोला साँघुरियो, विरूप भयो। उनीपछिका पुस्ताका लागि फिर्केको अस्तित्व तीव्र सहरीकरणसँगै कंक्रिटका संरचनाबीच च्यापिएको प्रदूषित खोला बन्न पुग्यो।