फ्राईडे रिलिज : देशभर एक्लै ‘आइ एम जीत बहादुर’

काठमाडौँ । आज (शुक्रबार)बाट देशभर फिल्म ‘आइ एम जीत बहादुर’ प्रदर्शनमा आएको छ । फ्राईडे रिलिजको परम्परा धान्दै प्रदर्शनमा आएको योसँग रिलिज हुने अर्को नयाँ फिल्म नहुँदा यसले देशभर एकल प्रदर्शन रिलिजको अवसर पाएको हो ।

यद्यपि देशभरका फिल्म हलमा ‘आइएम जितबहादुर’को कब्जामा भने छैन । किनभने यसअघि रिलिज भएका ‘लालिबजार’, रोल नम्बर १’ र केही विदेशी फिल्म पनि हलमा छन् ।

अभिनेता जितु नेपालको निर्माणमा बनेको फिल्म ‘आइ एम जीत बहादुर’ गाउँबाट सपना बोकेर शहर आएका एक युवाले कलाकार बन्नका लागि भोग्नुपरेका संघर्ष, चुनौती र यात्रालाई भावनात्मक ढंगले प्रस्तुत गरिएको फिल्म हो ।

भारतीय बङ्गाली निर्देशक सुभेन्दु घोषको कथा तथा निर्देशनमा बनेको फिल्ममा जितुको अपोजिटमा अभिनेत्री वर्षा राउत देखिएकी छन् । फिल्ममा प्रियंका कार्की, सन्दीप क्षेत्री, देशभक्त खनाल, पवन खतिवडा’बाबा’, नीरज नेपाल, अन्सु महर्जन लगायत कलाकारहरूको अभिनय छ ।

कर्मभूमि क्रिएशनको ब्यानरमा निर्माण भएको यस फिल्मका कार्यकारी निर्माता निश्चल कुँवर र नीरज नेपाल हुन् भने राजन सिंखडा तथा दीपेन्द्र अधिकारी सह–निर्माताका रूपमा रहेका छन्। भारतीय सिनेमाटोग्राफर अरविन्दको छायांकन रहेको फिल्मको पोस्ट–प्रोडक्सन कार्य भारतमै गरिएको हो । ‘आइ एम जीत बहादुर’ को वितरण आरआर फिल्म्सले गरेको छ । छ।