युवाका लागि सामाजिक सञ्जाल धूम्रपानजत्तिकै जोखिमपूर्ण ? बेलायतले ल्याउँदै कडा नियम

काठमाडौं । बेलायतका वरिष्ठ स्वास्थ्य विज्ञहरूले बालबालिका तथा किशोरकिशोरीमा सामाजिक सञ्जालको अत्यधिक प्रयोगले गम्भीर स्वास्थ्य समस्या निम्त्याउन सक्ने चेतावनी दिएका छन् । उनीहरूका अनुसार सामाजिक सञ्जालको अनियन्त्रित प्रयोगको असर धूम्रपानजस्तै दीर्घकालीन जोखिमपूर्ण हुन सक्छ, त्यसैले यस विषयलाई सार्वजनिक स्वास्थ्यको प्राथमिक मुद्दाका रूपमा हेर्न आवश्यक रहेको बताएका छन् ।

स्वास्थ्य क्षेत्रका विशेषज्ञहरूको समूहले विशेष गरी १६ वर्षभन्दा कम उमेरका बालबालिकाको सामाजिक सञ्जाल पहुँचमा कडाइ गर्न सरकारलाई आग्रह गरेको छ । चिकित्सकहरूको छाता संस्था एकेडेमी अफ मेडिकल रोयल कलेजले सरकारी परामर्श प्रक्रियामा बुझाएको सुझावमा बालबालिकाको मानसिक तथा व्यवहारिक स्वास्थ्य मूल्यांकन गर्दा चिकित्सकहरूले उनीहरूको स्क्रिन टाइम र सामाजिक सञ्जाल प्रयोगबारे नियमित रूपमा जानकारी लिनुपर्ने उल्लेख गरेको छ ।