बाँकेमा लागुऔषधसहित पाँच जना पक्राउ

बाँकेको कोहलपुर नगरपालिका र बैजनाथ गाउँपालिका क्षेत्रबाट दुई दिनको अन्तरालमा ठुलो परिमाणको लागुऔषध ब्राउन सुगरसहित पाँच जनालाई नियन्त्रणमा लिएको छ ।

इलाका प्रहरी कार्यालय कोहलपुर र लाुूऔषध नियन्त्रण ब्युरो शाखा कार्यालय नेपालगन्जको संयुक्त टोलीले विभिन्न स्थानमा चेकजाँचका क्रममा उनीहरूलाई नियन्त्रणमा लिएको हो ।

जिल्ला प्रहरी कार्यालय बाँकेका अनुसार बैजनाथ गाउँपालिका–३ सुतैयामा चेकजाँचका क्रममा कञ्चनपुरको बेलौरी नगरपालिका–१ घर भई हाल बैजनाथ–२ बस्ने २६ वर्षीय समिर शाही र भारतको बहराइच जिल्ला रुपैडियाका ४३ वर्षीय गोपी निसारलाई पक्राउ गरिएको छ ।

उनीहरूको साथबाट शुद्ध तौल २८ ग्राम २० मिलिग्राम ब्राउन सुगर बरामद भएको छ । दुवै जनाविरुद्ध लागूऔषध सम्बन्धी कसुरमा बाँके जिल्ला अदालतबाट १० दिनको म्याद थप गरी अनुसन्धान भइरहेको जिल्ला प्रहरी कार्यालय बाँकेका प्रवक्ता प्रहरी नायब उपरिक्षक प्रतितसिंह राठोरले जानकारी दिनुभयो ।

उहाँका अनुसार सोही प्रकारले कोहलपुर नगरपालिका–११ गोलपार्कबाट दैलेख नारायण नगरपालिका–१ पुरानो बजारकी ३३ वर्षीया मनकुमारी खड्का पक्राउ पर्नुभएको छ ।

उहाँका साथबाट २ ग्राम ५०० मिलिग्राम ब्राउन सुगर बरामद भएको छ । उहाँलाई अदालतबाट ७ दिनको म्याद थप गरी अनुसन्धान अघि बढाइएको प्रहरी प्रवक्ता राठोरको भनाइ छ ।

यसैगरी कोहलपुर नगरपालिका–६ शिव मन्दिर क्षेत्रमा चेकजाँचका क्रममा स्थानीय २८ वर्षीय कृष्णकुमार थारू र २२ वर्षीय प्रकाश वलीलाई प्रहरीले पक्राउ गरेको छ ।

उनीहरूको साथबाट १ ग्राम २६० मिलिग्राम ब्राउन सुगर बरामद भएको प्रहरीले जनाएको छ । दुवै जनाविरुद्ध लागुऔषध सम्बन्धी कसुरमा १० दिनको म्याद थप गरी अनुसन्धान भइरहेको छ ।

दुई दिनको अवधिमा कोहलपुर र बैजनाथ क्षेत्रमा ब्राउन सुगरसहित पाँच जना पक्राउ परेसँगै लागुऔषध नियन्त्रण अभियानलाई प्रहरीले थप तीव्र बनाएको बाँकेका प्रहरी प्रवक्ता राठोरले बताउनुभयो ।

उहाँले बाँके प्रहरीले लागूऔषध ओसारपसार तथा कारोबारमा संलग्न व्यक्तिमाथि निगरानी बढाएको र अनुसन्धानलाई पनि तीव्र पारेको जनाउनुभयो ।