मुस्ताङका उच्चलेकमा यार्सा सङ्कलन सुरु, एआई ड्रोनमार्फत निगरानी कडा

काठमाडौं- मुस्ताङका चार स्थानीय तहका उच्च हिमाली लेक, खर्क र पाटन क्षेत्रमा बहुमूल्य जडीबुटी यार्सा गुम्बा सङ्कलन सुरु भएको छ। राष्ट्रिय प्रकृति संरक्षण कोषअन्तर्गत अन्नपूर्ण संरक्षण क्षेत्र आयोजना (एक्याप) जोमसोम र लोमान्थाङको कार्यक्षेत्रमा पर्ने विभिन्न उच्चलेकमा यार्सा टिप्न स्थानीयसँगै जिल्ला बाहिरबाट समेत सङ्कलकहरू पुगेका छन्।

समुद्री सतहबाट चार हजार मिटरभन्दा माथिका क्षेत्रमा पाइने यार्सा गुम्बा सङ्कलनका लागि सम्बन्धित संरक्षण क्षेत्रले शुल्क तोकेर अनुमति वितरण गरिरहेका छन्। वैशाखदेखि असारसम्म चल्ने यार्सा सिजनका लागि थासाङ, घरपझोङ, वारागुङ मुक्तिक्षेत्र र लोघेकर दामोदरकुण्ड गाउँपालिकाका विभिन्न संरक्षण व्यवस्थापन समितिले सङ्कलन फुकुवा गरिसकेका छन्।