काठमाडौँमा गर्मीको पारो चढ्दै : शीतल हुन पोखरीमा पौडी खेल्दै बाँदर

काठमाडौँ । पछिल्ला दिनहरूमा सङ्घीय राजधानी काठमाडौँ उपत्यकाको तापक्रम क्रमशः बढ्दै गएको छ।

जेठ महिनाको सुरुवातीसँगै बढेको चर्को गर्मीको प्रभाव अहिले मानिसमा मात्र नभएर पशुपंक्षीहरूमा समेत प्रत्यक्ष रूपमा देखिन थालेको छ। बढ्दो तापक्रम र रापबाट जोगिनका लागि पशुपंक्षीहरूले पनि आ-आफ्नै किसिमका उपायहरू अपनाउन थालेका छन्।

यसै क्रममा ऐतिहासिक एवं पर्यटकीय स्थल स्वयम्भू परिसरमा अचेल फरक दृश्य देखिन थालेको छ। स्वयम्भू परिसरमा निर्माण गरिएको पोखरीमा त्यहाँका बाँदरहरू दैनिकजसो पौडी खेलिरहेका भेटिन्छन्।

तिर्खा मेट्ने र शरीरलाई शीतल बनाउने उद्देश्यले बाँदरहरू पोखरीको पानीमा हामफाल्ने, डुबुल्की मार्ने र पौडी खेल्ने गरिरहेका छन्। गर्मी बढेसँगै स्वयम्भूका बाँदरहरू पोखरीमा पौडी खेल्दै आफ्नो शरीर शीतल बनाइरहेका छन्।

पोखरीमा बाँदरहरूले पौडी खेलेर गर्मी छलेको यो रोचक दृश्यले त्यहाँ पुग्ने आन्तरिक तथा बाह्य पर्यटकहरूको समेत ध्यान तानेको छ।