साउदी अरेबियाको ‘नियोम’ परियोजना कटौती, ८० हजार नेपाली श्रमिकको रोजगारी जोखिममा

काठमाडौं– साउदी अरेबियाको महत्त्वाकांक्षी ‘नियोम’ मेगा–सिटी परियोजनामा निर्माण सम्झौता कटौती र रद्द हुन थालेपछि त्यहाँ रहेका हजारौं नेपाली श्रमिकको भविष्य अन्योलमा परेको छ।

साउदी अरेबियाली सञ्चारमाध्यमका अनुसार विभिन्न निर्माणस्थलमा कार्यरत करिब ८० हजार नेपाली कामदार अचानक रोजगारीको संकटमा परेका हुन् ।

साउदी सरकारले परियोजना पूर्ण रूपमा बन्द नभई ‘पुनः प्राथमिकतामा राखिएको’ दाबी गरे पनि निर्माणस्थलको अवस्था भने फरक देखिएको छ। एक समय हजारौं श्रमिकले भरिएका विशाल श्रमिक शिविरहरू अहिले क्रमशः खाली हुँदै गएका छन्। ठूला अन्तर्राष्ट्रिय निर्माण कम्पनीहरूले सम्झौता अन्त्य गरेसँगै रोजगारी कटौती तीव्र बनेको बताइएको छ।

मलेसियाली कम्पनी एभर्सेन्डाइले ‘ट्रोजेना स्की भिलेज’ परियोजनाबाट हात झिकेको छ। उक्त परियोजनामा कार्यरत करिब ३ हजार नेपालीमध्ये अधिकांशलाई स्वदेश फर्काइसकिएको छ।

यस्तै इटालीको वेबिल्ड र दक्षिण कोरियाली कम्पनी हुन्डाई इन्जिनियरिङसँग भएका अर्बौं डलर बराबरका सम्झौता पनि रद्द गरिएका छन्। यससँगै सुरुङ यातायात सञ्जाल तथा कृत्रिम ताल निर्माणका कामसमेत रोकिएका छन्।