साउदी अरबमा शरीर जोडिएका फिलिपिन्सका जुम्ल्याहा दिदीबहिनीको सफल शल्यक्रिया

रियाद । शरीर जोडिएका फिलिपिन्सका जुम्ल्याहा दिदीबहिनी ओलिभिया र जियाना म्यानुएललाई साउदी अरबको जुम्ल्याहा शल्यक्रिया कार्यक्रमअन्तर्गत बिहीबार सफलतापूर्वक छुट्याइएको छ ।

रियादस्थित किङ अब्दुल्लाह स्पेसलाइज्ड चिल्ड्रेन्स अस्पतालमा करिब छ घण्टा लामो जटिल शल्यक्रियापछि उनीहरूलाई अलग गरिएको हो ।

२२ जना विशेषज्ञ, चिकित्सक, नर्स तथा प्राविधिक सम्मिलित टोलीले शल्यक्रिया सम्पन्न गरेको थियो । छाती र पेटबाट जोडिएका यी जुम्ल्याहाको कलेजो तथा आन्द्राको केही भागसमेत साझा रहेको थियो ।

चिकित्सकहरूका अनुसार जियानामा जन्मजात मुटुको समस्या रहेको छ र उनलाई थप मुटुको शल्यक्रिया आवश्यक पर्नेछ ।

सन् १९९० देखि सञ्चालनमा रहेको साउदी कार्यक्रमअन्तर्गत यो ७२औँ जुम्ल्याहा छुट्याउने शल्यक्रिया हो ।

सफल शल्यक्रियापछि जुम्ल्याहा दिदीबहिनी केही समय रियादमै चिकित्सकीय निगरानीमा रहनेछन् ।