दाताले दान गरेका मानव शव इजरायली सेनालाई बेच्दै अमेरिका

एजेन्सी । अमेरिकाको युनिभर्सिर्टी अफ साउथर्न क्यालिफोर्नियाले वैज्ञानिक अनुसन्धान र चिकित्सकीय शिक्षाका लागि दान गरिएका मानव शवहरू अमेरिकी नौसेनालाई उपलब्ध गराएको तथा ती शवमध्ये केही इजरायली सैन्य चिकित्सकहरूको तालिममा प्रयोग भएको खुलासा भएपछि विवाद चुलिएको छ ।

विभिन्न अनुसन्धानमूलक प्रतिवेदनहरूले दाताहरू र तिनका परिवारलाई शवको प्रयोग सैन्यसम्बन्धी तालिममा हुन सक्नेबारे स्पष्ट जानकारी नदिइएको दाबी गरेका छन् ।

अमेरिकी नौसेना सँग विश्वविद्यालयले गरेको सम्झौताअनुसार सन् २०१७ यता कम्तीमा ८९ वटा शव सैन्य चिकित्सा तालिमका लागि प्रयोग गरिएको बताइएको छ । तीमध्ये ३२ वटा शव इजरायली सैन्य चिकित्सकहरूको शल्यक्रिया सम्बन्धी तालिममा प्रयोग भएको दाबी गरिएको छ ।

अनुसन्धानअनुसार यूएससीले यस कार्यक्रमबाट ८ लाख ६० हजार डलरभन्दा बढी रकम प्राप्त गरेको थियो ।

यो तालिम इजरायली सुरक्षा फौजका चिकित्सक, नर्स र एनेस्थेसियोलोजिस्टहरूलाई लक्षित रहेको बताइएको छ । कार्यक्रमको उद्देश्य युद्ध वा आपत्कालीन अवस्थाका घाइतेहरूको उपचारमा दक्षता विकास गर्नु रहेको विश्वविद्यालय पक्षले जनाएको छ ।

यद्यपि, मानव शरीर दान कार्यक्रमका आलोचकहरूले दाताको ‘जानकारीसहितको सहमति’ बिना शव सैन्य तालिममा प्रयोग गर्नु नैतिक रूपमा गम्भीर प्रश्न भएको बताएका छन् । केही विद्यार्थी र चिकित्सकहरूले पनि विश्वविद्यालयसँग पारदर्शिता माग गर्दै विरोध जनाएका छन् ।