सडकको राइट अफ वे स्पष्ट छैन, नागरिकलाई अनावश्यक मालपोतको भार : बुर्लाकोटी

काठमाडौँ । राष्ट्रिय स्वतन्त्र पार्टी (रास्वपा) का मुख्य सचेतक कवीन्द्र बुर्लाकोटीले देशैभरि सडक निर्माणका नाममा नागरिकमाथि भइरहेको अन्यायपूर्ण आर्थिक भारको अन्त्य गर्न माग गरेका छन् । प्रतिनिधिसभाको शुक्रबारको बैठकमा उनले सडकको मापदण्ड र कर कट्टाको विषयमा सरकारको ध्यानाकर्षण गराएका हुन्।

मुख्य सचेतक बुर्लाकोटीले वर्षौँअघि निर्माण भएका सडकहरूको मालपोत जग्गादाता नागरिकले नै तिर्नुपर्ने बाध्यता रहेको भन्दै यसलाई आश्चर्यजनक र अन्यायपूर्ण भनेका छन् । उनले भने– ‘देशभर सडक खनेका छन्, सवारी गुडिरहेका छन्, तर ती सडकको मालपोत भने अझै पनि वर्षौँदेखि जग्गादाता नागरिकले नै तिरिरहेका छन्। यो भन्दा ठुलो विडम्बना के हुन सक्छ ?’