बुटवलमा बसको ठक्करबाट क्रिकेटर बेल्बासेको मृत्यु

रुपन्देहीकाे बुटवलमा यात्रु बसले मोटरसाइकललाई ठक्कर दिँदा एक जनाको मृत्यु भएको छ ।

बुटवल उपमहानगरपालिका–१३ बेलबासस्थित सालघारी चोकमा बसको ठक्करबाट अर्घाखाँचीको शीतगंगा नगरपालिका–३ ठाडाका अन्दाजी ३०–३५ वर्षीय अमृत बेल्बासेको मृत्यु भएको प्रहरीले जनाएको छ ।

मंगलबार दिउँसो काँकडभिट्टादेखि महेन्द्रनगरतर्फ जाँदै गरेको प्रदेश १–०१–००१ ख ४२२३ नम्बरको बसले विपरीत दिशाबाट बुटवलतर्फ आइरहेको बा ८७ प ३४९९ नम्बरको मोटरसाइकललाई ठक्कर दिएको इलाका प्रहरी कार्यालय बुटवलका प्रहरी नायब उपरीक्षक निशान्त श्रीवास्तवले जानकारी दिए ।

बसको ठक्करबाट गम्भीर घाइते भएका बेल्बासेलाई तत्काल उपचारका लागि लुम्बिनी प्रादेशिक अस्पतालमा ल्याइएकोमा चिकित्सकले मृत घोषणा गरेको उनले बताए ।

ठक्कर दिने बस र बसका चालक झापाको मेची नगरपालिका–८ का ४३ वर्षीय पर्वत धिमाललाई नियन्त्रणमा लिएर थप अनुसन्धान भइरहेको प्रहरीले जनाएको छ । मृतक बेल्बासे क्रिकेट खेलाडी रहेको बताइएको छ । उनी हाल बुटवल–१३ बेलबासमा बस्दै आएका थिए ।

प्रकाशित मिति: मंगलबार, जेठ १२, २०८३

२०:३१