पाँच लाख सदस्यले महाधिवेशनमा भाग लिने कांग्रेसको आकलन

काठमाडौं । नेपाली कांग्रेसले १५औँ महाधिवेशनमा पाँच लाख क्रियाशील सदस्यले भाग लिने आकलन गरेको छ ।

सदस्यता व्यवस्थापन केन्द्रीय समितिका संयोजक महामन्त्री प्रदीप पौडेलले सदस्यता अद्यावधिक अभियानमा देखिएको सहभागिताले महाधिवेशनमा बढीमा पाँच लाख सदस्यले भाग लिने आकलन गरेका हुन् ।

उनी त्यो संख्यापछि अद्यावधिकका लागि म्याद थप गर्नु नपर्ने बताउँछन् । “जेठ २१ गतेभित्र हाम्रो क्रियाशील सदस्यता अद्यावधिक गरेर साढे ४–५ लाखको हाराहारीमा पुग्छ जस्तो छ,” महामन्त्री पौडेलले बाह्रखरीसित भने, “त्यसपछि अद्यावधिकको समय थप्नुपर्दैन होला ।”

१४औँ महाधिवेशनअघि नेपाली कांग्रेसले ८ लाख ७२ हजार सदस्य कायम गरेको थियो । त्यतिबेला १७ जिल्लाबाट सदस्यता फाराम भरी शुल्कसमेत बुझाएका सदस्यहरूलाई १४ औँ महाधिवेशनमा भाग लिन नमिल्ने गरी १५औँ महाधिवेशनका लागि कायम गरिएको थियो ।

कांग्रेसले सार्वजनिक गरेको सदस्यको तथ्यांकमा त्यसरी रोकिएका सदस्यहरूको विवरण समेटिएको छैन ।

त्यसरी रोकिएका सदस्यको तथ्यांकमा पनि कांग्रेसमा फरक–फरक मत पाइएको छ । पौडेल १५औँ महाधिवेशनका लागि १४औँ महाधिवेशनअगावै स्वीकृत भएका सदस्यको संख्या ६० हजार भएको बताउँछन् ।

उनी ती सदस्य पुरानो संस्थापन पक्षका रहेको भन्दै त्यसले देउवा पक्ष खुसी हुने तर्क गरिरहेका छन् । त्यतिखेर देउवा पक्षीय नेता रमेश लेखककै नेतृत्वमा सदस्यता छानबिन समिति बनेको थियो ।

समितिमा वर्तमान महामन्त्री पौडेल, केन्द्रीय सदस्य रमेश रिजाल तथा पूर्वकेन्द्रीय सदस्यहरू श्याम घिमिरे र कल्याण गुरुङ सदस्य थिए ।

“यो निर्णयले झन्डै ६० हजार सदस्य लाभान्वित हुनुहुनेछ । उहाँहरूले गरेका निर्णयलाई झन् बलियो बनाइदिएका छौँ हामीले,” उनले भने, “यसमा त देउवा पक्षीय खुसी नै हुनुपर्छ, कुरा बुझ्नुभयो भने विरोधचाहिँ नगर्नुहोला ।”

कांग्रेसको सदस्य संख्या कसरी घट्यो ?

१४औँ महाधिवेशनमा कांग्रेसको सदस्यता संख्या ८ लाख ७२ हजार थियो । कांग्रेसले १५औँ महाधिवेशनका लागि साढे पाँच लाख आवेदन फाराम पठाएको छ ।

पार्टी छाडेर गएका, मृत्यु भएका र क्रियाशील सदस्यता कायम नरहेकालाई घटाउँदै त्यो संख्या साढे ५ लाख हुने कांग्रेसका महामन्त्री पौडेलको आकलन छ ।

महामन्त्री पौडेलले बाह्रखरीसित भने, “जेठ २१ गतेभित्र हाम्रो क्रियाशील सदस्यता अद्यावधिक गरे साढे ४–५ लाखको हाराहारीमा पुग्छ जस्तो छ । समय थप्नुपर्दैन होला ।”

विशेष महाधिवेशनअघि केन्द्रीय समितिबाट सदस्यता नवीकरणको मिति तोकिएपछि शतप्रतिशत बढी फाराम लान सक्ने गरी परिपत्र भएको थियो । तर, सबै जिल्ला र निर्वाचन क्षेत्रले आ–आफ्नो माग अनुसार सदस्यता फाराम लैजाँदा करिब पाँच लाख मात्र फाराम गएका हुन् ।

अलमलमा इतर पक्ष

संस्थापन पक्ष सदस्यता अद्यावधिक गर्न मेहनत गरिरहँदा इतर पक्षले भने त्यसमै प्रश्न उठाइरहेको छ । उसले १५औँ महाधिवेशनका लागि सदस्यता नवीकरण गरेर पठाइसकिएको भन्दै नपठाएका जिल्लाका सदस्य बुझेर साझा संयन्त्रबाट छानबिन प्रक्रिया अघि बढाउनुपर्ने बताइरहेको छ ।

तर, संस्थापन पक्ष भने साझा संयन्त्रलाई विधानले नचिन्ने भन्दै विधान नमान्नेलाई पार्टीबाटै बिदा गर्ने बताइरहेको छ ।

कांग्रेसका सभापति गगनकुमार थापाले पार्टीको नीति र विधानको बर्खिलापमा जाने जुनसुकै तहका नेता तथा कार्यकर्तालाई कारबाहीको दायरामा ल्याउने चेतावनी यसअघि नै दिइसकेका छन् ।

केही दिनअघि विराटनगरमा उनले पार्टीको क्रियाशील सदस्यता नवीकरण र अद्यावधिक गर्ने कार्यमा व्यवधान खडा गर्नेहरूलाई तत्काल पदबाट मुक्त गरिने स्पष्ट पारे ।

सभापति थापाले भने, “कुनै पनि तहबाट कसैले पनि सदस्यता अद्यावधिकमा अवरोध सिर्जना गर्नुभयो भने पार्टीको विधानअनुसार साथीलाई धन्यवाद भनेर मैले अर्को साथीलाई जिम्मेवारी दिन्छु ।”

सदस्यता अद्यावधिक भइरहेको र पहिले स्थगित गरिएका सदस्यलाई पनि पुरानै मानी नवीकरण गरिएको विषयमा निवर्तमान कार्यवाहक सभापति पूर्णबहादुर खड्का अनभिज्ञता प्रकट गर्छन् ।

उनीसँग बाह्रखरीले प्रतिक्रिया माग्दा आफूलाई केही पनि थाहा नभएको बताए । “म सुर्खेतमै छु । केही दिनपछि मात्रै काठमाडौँ फर्किन्छु,” खड्काले भने, “मलाई केही थाहा पनि छैन, ध्यान पनि छैन ।”

इतर पक्षका नेता प्रकाशशरण महतले पनि संस्थापनले चलाइरहेको अभियान र परिपत्रबारे अनभिज्ञता जाहेर गरे । उनले बाह्रखरीसित भने, “निर्णयबारे मलाई केही थाहा छैन ।”

संस्थापन पक्ष भन्छ : कसैलाई छुटाउँदैनौँ

संस्थापन पक्षले सार्वजनिक स्थलबाटै हरेक समितिमा इतरका नेताहरूलाई समेट्न खोजेको घोषणा गरिसकेको छ ।

सभापति थापाले प्रदेश भेलामा भनिरहेका छन्, “आउनुहोस्, तपाईंहरूले जहाँ चाहनुहुन्छ त्यहीँ राखेर हामी मिलेर जान चाहन्छौँ ।”

महामन्त्री पौडेलले देउवा पक्षले क्रियाशील सदस्यता अद्यावधिक किन गर्न नखोजेको बुझ्नै नसकेको बताए ।

“समानान्तर गतिविधिले मिल्न खोजेको या संवाद गर्न खोजेको बुझिँदैन । हाम्रो प्रयास मिलाउनेमै छ । सदस्यता व्यवस्थापन समितिमा बस्न चाहनुहुन्छ भने पनि आउनुहोस् भनेका छौँ,” उनले थपे, “उहाँहरूलाई पर्खेर बसिरहेका छौँ । निर्वाचन समिति पनि खाली छ ।”

यसअघि इतर पक्षका निवर्तमान कार्यवाहक सभापति खड्का र डा. शेखर कोइरालासँग छलफल गरिसकेका कांग्रेस सभापति थापाले केही दिनमै फेरि निर्णायक छलफल गर्ने तयारी गरेको महामन्त्री पौडेलले बताए ।

#नेपाली कांग्रेस

#क्रियाशील सदस्यता विवाद

#संस्थापनइतर पक्ष

#१५औँ महाधिवेशन