भूमि समस्या समाधान समितिप्रति गाउँपालिकाको गुनासो

जिल्लास्थित भूमि समस्या समाधान समितिले स्थानीय सरकारसँग समन्वय नगरेको गुनासो पाइएको छ । प्रमुख जिल्ला अधिकारीको संयोजकत्वमा रहने समितिले समन्वय नगरेको भन्दै रोङ गाउँपालिकाले समितिको लिखित ध्यानाकर्षणसमेत गरेको छ ।

रोङ गाउँपालिका अध्यक्ष मनीकुमार स्याङ्बोले गाउँपालिकाले सबै तयारी गरेपनि भूमि समस्या समाधान समितिले सक्रियतासाथ काम नगर्दा धनीपूर्जा वितरणमा समस्या भएको बताए । ‘भूमि समस्या समाधान गर्न यसअघिको कार्यविधिको पाँचौं चरणसम्मको काम स्थानीय सरकारले गरिसकेको छ,’ अध्यक्ष स्याङ्बोले भने, ‘तर, जिल्लास्थित समितिले हालसम्म नयाँ कानुनबारे न छलफल र अन्तरक्रिया गरेको छ, न कुनै समन्वय नै ।’