काठमाडौंबाट पनि रविलाई संगठित अपराध अभियोगमा उन्मुक्ति, सहकारी ठगी मुद्दा भने कायम

काठमाडौं । काठमाडौं जिल्ला अदालतले राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध स्वर्णलक्ष्मी सहकारी ठगी प्रकरणमा लगाइएको संगठित अपराधसम्बन्धी अभियोग फिर्ता लिन अनुमति दिएको छ।

न्यायाधीश आत्मदेव जोशीको इजलासले शुक्रबार जिल्ला सरकारी वकिल कार्यालय, काठमाडौंले दायर गरेको अभियोग संशोधनसम्बन्धी निवेदन स्वीकार गर्दै लामिछानेसहितका प्रतिवादीमाथि लगाइएको संगठित अपराधको कसुर हटाउन आदेश दिएको हो।

अदालतले मुलुकी फौजदारी कार्यविधि संहिता, २०७४ को दफा ३६ बमोजिम अभियोग संशोधन गर्न अनुमति दिएको भए पनि लामिछानेविरुद्धको सहकारी ठगीसम्बन्धी मुद्दा भने यथावत् राखेको छ।

आदेशमा अदालतले पीडितमुखी न्यायको अवधारणालाई आधार बनाएको उल्लेख गर्दै पीडितलाई क्षतिपूर्तिसहित न्याय दिलाउने प्रक्रियामा कठोर अभियोग र लामो फौजदारी प्रक्रिया बाधक बन्न सक्ने भएकाले सार्वजनिक हित, अभियोजनको स्वायत्तता, पीडितको अधिकार र न्यायिक सन्तुलनलाई ध्यानमा राखेर निर्णय गरिएको जनाएको छ।

स्वर्णलक्ष्मी सहकारी ठगी प्रकरणमा लामिछानेसहित छविलाल जोशी र जीबी राईविरुद्ध सहकारी ठगी तथा संगठित अपराधसम्बन्धी मुद्दा दायर गरिएको थियो। सुमन खनाललगायतको जाहेरीका आधारमा नेपाल सरकार वादी रहेको उक्त मुद्दामा सरकारी वकिल कार्यालयले अभियोगपत्र संशोधनका लागि अदालतमा निवेदन दिएको थियो।

यसअघि पर्सा र रुपन्देही जिल्ला अदालतले पनि लामिछानेविरुद्ध दायर संगठित अपराध तथा सम्पत्ति शुद्धीकरणसम्बन्धी अभियोग फिर्ता लिन अनुमति दिइसकेका छन्। काठमाडौं जिल्ला अदालतको पछिल्लो आदेशसँगै स्वर्णलक्ष्मी सहकारी प्रकरणमा लामिछानेविरुद्ध सहकारी ठगीको मुद्दा मात्रै कायम रहने भएको छ।