प्राडा. चन्दा कार्कीका दुई नयाँ कृति विमोचन

काठमाडौं- स्वास्थ्य, चिकित्सा शिक्षा र साहित्यलाई एकसाथ समेट्दै प्रा. डा. चन्दा कार्की (भण्डारी) का दुई नयाँ कृतिहरू शुक्रबार राजधानीमा विमोचन गरिएका छन्। डा. कार्कीद्वारा लिखित कविता सङ्ग्रह 'छचल्किएका भावनाहरू' र चिकित्सा शिक्षासम्बन्धी पुस्तक 'Essential Instruments Used in Obstetrics and Gynaecology' को संयुक्त रूपमा विमोचन गरिएको हो।

उक्त कृतिहरू प्रतिनिधि सभा सदस्य कामिनी चौधरी, वरिष्ठ जनस्वास्थ्य विशेषज्ञ डा. बेनु बहादुर कार्की, नेपाल प्रसूति एवम् स्त्री रोग विशेषज्ञ समाजकी उपाध्यक्ष डा. सपना अमात्य, प्रा. डा. ज्ञानेन्द्र मान सिंह कार्की र पूर्व सांसद एवं महिला अधिकारकर्मी बिन्ध्यबासिनी कंसाकार लगायतका व्यक्तित्वहरूले संयुक्त रूपमा विमोचन गरेका हुन्।

विमोचित कृतिहरूमध्ये 'छचल्किएका भावनाहरू' कविता सङ्ग्रह हो भने “Essential Instruments Used in Obstetrics and Gynaecology” चिकित्सा तथा नर्सिङ क्षेत्रमा अध्ययनरत विद्यार्थी, प्रशिक्षार्थी र चिकित्सकहरूका लागि उपयोगी शैक्षिक पुस्तक हो। Essential Instruments Used in Obstetrics and Gynaecology पुस्तकका सहलेखक डा सुमन ताम्रकार र डा. हिरा तुलाधर हुन्।

लेखक डा. कार्कीका अनुसार यी कृतिहरू केवल साहित्यिक र शैक्षिक अभिव्यक्ति मात्र नभएर समाजप्रतिको उत्तरदायित्वसँग जोडिएको मानवीय अभियान पनि हुन्। पुस्तक बिक्रीबाट प्राप्त हुने सम्पूर्ण रकम 'शिवचन्द्र स्मृति प्रतिष्ठान' मार्फत विपन्न, पिछडिएका र अवसरबाट वञ्चित समुदायको शिक्षा, स्वास्थ्य तथा सामाजिक उत्थानका क्षेत्रमा पारदर्शी रूपमा खर्च गरिने बताइएको छ।

प्रा. डा. चन्दा कार्की नेपालको स्वास्थ्य र चिकित्सा शिक्षाको क्षेत्रमा चार दशकभन्दा बढी समय काम गरेकी छिन्। नियमित सेवाबाट अवकाश पाएपछि पनि सामाजिक अभियानमा सक्रिय रहेकी उनी रवि लामिछानेले नेतृत्व राष्ट्रिय स्वतन्त्र पार्टी (रास्वपा) मार्फत आफ्नो राजनीतिक यात्रासमेत प्रारम्भ गरेकी छिन्। उनी पूर्व सांसद पनि हुन्।