हाकिमीविरुद्ध बलात्कारको मुद्दामा सुनुवाइ हुने

काठमाडाैं । मोरक्को राष्ट्रिय फुटबल टोलीका कप्तान तथा पेरिस सेन्ट जर्मेन (पीएसजी)का डिफेन्डर अशरफ हाकिमीविरुद्ध बलात्कारको मुद्दामा अदालतमा सुनुवाइ हुने भएकाे छ ।

सन् २०२३ मा फ्रान्सको राजधानी पेरिसस्थित हाकिमीको घरमा आफूमाथि बलात्कार भएको एक २४ वर्षीया महिलाले आरोप लगाएकी थिइन्। सोही आरोपका आधारमा पेरिसको पश्चिमी उपनगर नान्टेरेको सरकारी वकिलको कार्यालयले सन् २०२३ को मार्च महिनादेखि यस विषयमा प्रारम्भिक अनुसन्धान सुरु गरेको थियो।

अनुसन्धान अधिकारीले सन् २०२६ को फेब्रुअरीमा यस मुद्दालाई अदालत लैजाने आदेश दिएका थिए। फ्रान्सेली सञ्चारमाध्यमहरूका अनुसार २७ वर्षीय हाकिमीले उक्त मुद्दा खारेज गर्नका लागि गरेको पुनरावेदन अदालतले अस्वीकार गरिदिएको छ।

विश्वकप अन्तर्गत शुक्रबार स्कटल्याण्डविरुद्ध हुने मोरक्कोको दोस्रो खेलमा टोलीको नेतृत्व सम्हाल्न लागेका हाकिमीले आफूमाथिको आरोपलाई लगातार अस्वीकार गर्दै आएका छन्।

शुक्रबार सामाजिक सञ्जालमा लेख्दै हाकिमीले भनेका छन्, “न्याय प्रणालीले मेरो आँखामा हेरेर भनेको थियो– ‘यदि तिमी चर्चित व्यक्ति नभएको भए यो मुद्दा कहिल्यै बन्ने थिएन।’ मैले वर्षौंसम्म शान्त बस्ने विकल्प रोजेँ। आफ्नो मर्यादा कायम राख्दा, धैर्य गर्दा र न्याय प्रणालीमाथि विश्वास गर्दा सही निर्णय आउनेछ भन्नेमा म विश्वस्त थिएँ।”

उनले थप लेखेका छन्, “आज मेरो परिवार, मेरो जीवन र विशेष गरी सत्यको भोगमानमा एउटा यस्तो कथा बुनिएको छ जुन मेरो होइन। म कहिलेकाहीँ आफूलाई सजिलो निसाना बनाइएको महसुस गर्छु। म पहिलो दिनदेखि नै यो अदालती सुनुवाइको पर्खाइमा थिएँ र अहिले उत्सुकताका साथ पर्खिरहेको छु। अन्ततः मैले आफ्नो कुरा राख्न पाउनेछु।”

अर्कोतर्फ, पीडित महिलाकी वकिल रेचेल–फ्लोर पार्दोले एक विज्ञप्ति जारी गर्दै अदालतको यो निर्णयले पीडितलाई राहत र आशा दिएको बताएकी छन्।

मोरक्कोका समूह चरणका सबै खेलहरू संयुक्त राज्य अमेरिकामा भइरहेका छन्, जहाँ टोली हाल बसिरहेको छ। तर, मोरक्को नकआउट चरणमा प्रवेश गरेमा र उसका खेलहरू अमेरिकाबाहिर परेमा हाकिमीलाई क्यानडा वा मेक्सिको प्रवेशमा कठिनाइ हुन सक्ने देखिएको छ।

क्यानडा सरकारको आधिकारिक वेबसाइटका अनुसार “कुनै पनि अपराधमा संलग्न भएको वा दोषी ठहरिएको” व्यक्तिलाई देश प्रवेशमा रोक लगाउन सकिने प्रावधान छ। यसै नियमका कारण गत हप्ता घानाका मिडफिल्डर थोमस पार्टीले पानामाविरुद्धको पहिलो खेल गुमाएका थिए। ३२ वर्षीय पार्टीमाथि सन् २०२० देखि २०२२ को बीचमा चार फरक महिलाहरूले लगाएको बलात्कारका सातवटा र यौन दुर्व्यवहारको एउटा मुद्दा चलिरहेको छ र उनको सुनुवाइ आगामी वर्ष हुँदैछ।

यस वर्षको विश्वकप क्वाटरफाइनल खेल अघिसम्म तीनवटै सह–आयोजक देशहरू (अमेरिका, क्यानडा र मेक्सिको) मा आयोजना भइरहेको छ भने क्वाटरफाइनल पछिका सबै खेलहरू अमेरिकामा मात्र हुनेछन्।

मोरक्कोका लागि ९७ क्याप जितिसकेका हाकिमीले सन् २०१६ मा १७ वर्षको उमेरमा अन्तर्राष्ट्रिय खेल जीवनको सुरुवात गरेका थिए। सन् २०२२ को विश्वकपमा मोरक्कोलाई सेमिफाइनलसम्म पुर्‍याएर इतिहास रच्ने टोलीका उनी एक प्रमुख खम्बा थिए। विश्वकपको सेमिफाइनल पुग्ने मोरक्को पहिलो अफ्रिकी राष्ट्र हो।