शुक्लाफाँटामा ३१३ पुगे कृष्णसार

कञ्चनपुर । शुक्लाफाँटा राष्ट्रिय निकुञ्ज अन्तर्गतको हीरापुर संरक्षण क्षेत्रमा दुर्लभ वन्यजन्तु कृष्णसारको सङ्ख्या ३१३ पुगेको छ। करिब डेढ दशकअघि सुरु गरिएको संरक्षण कार्यक्रमले उल्लेखनीय सफलता हासिल गरे पनि बढ्दो सङ्ख्यासँगै यसको व्यवस्थापन र दीर्घकालीन संरक्षण चुनौतीपूर्ण बन्दै गएको निकुञ्ज प्रशासनले जनाएको छ।

निकुञ्जको पछिल्लो गणनाअनुसार संरक्षण क्षेत्रमा ८१ वयस्क भाले, २० अर्धवयस्क भाले, १०२ वयस्क पोथी, २६ अर्धवयस्क पोथी तथा ८४ पाठापाठी रहेका छन्। संरक्षण प्रयास प्रभावकारी बन्दै जाँदा कृष्णसारको सङ्ख्या निरन्तर वृद्धि भएको निकुञ्जका सूचना अधिकारी पुरुषोत्तम वाग्लेले बताए।