चिनियाँ संशय चिर्न नेपालले गर्नुपर्ने काम

नयाँ सरकार बनेपछि परराष्ट्रमन्त्री शिशिर खनालले दुई छिमेकी राष्ट्रमध्ये सुरुमा भारत र त्यसपछि चीनको भ्रमण गर्नुभएको छ। दुई देशबीचको सम्बन्ध सुमधुर बनाइराख्न, चिनजान गर्न र नयाँ सरकारप्रति विश्वास हासिल गरेर सहकार्यको वातावरण बनाउन यी भ्रमण भएको देखिन्छ।

चीनमा भएको द्विपक्षीय भेटवार्तापछि त्यहाँका विदेशमन्त्री वाङ यीले बताएको भनी सञ्चारमाध्यममा केही कुरा आएका छन्। त्यो हेर्दा नेपालको वर्तमान सरकारबारे चीनले विश्वास गर्न नसकेको, संशय गरेको देखिन्छ। विदेशमन्त्रीस्तरीय भेटवार्तामा वाङले ‘टाढाको नातेदारभन्दा नजिकको छिमेकी महत्त्वपूर्ण हुन्छ’ भन्ने टिप्पणी गर्नुभयो। यसको अर्थ, नेपाल छिमेक सम्बन्धभन्दा टाढा गइरहेको हो कि भन्ने चिनियाँ आशंका हुन सक्छ।