सबै मन्त्रीसँग कानुन मन्त्री गौतमको छलफल, असार मसान्तभित्र विधेयक सूची तयार गर्न आग्रह

कानुन, न्याय तथा संसदीय मामिला मन्त्रालयले आगामी आर्थिक वर्षमा संसद्मा पठाइने विधेयकहरूबारे मन्त्रालयगत छलफल सम्पन्न गरेको छ।

कानुनमन्त्री सोबिता गौतमले विभिन्न मन्त्रालयका मन्त्री, सचिव एवं अन्य कर्मचारीहरूसँग दैनिक छलफल गरेकी थिइन्। संसद्मा पठाइने कानुनहरूबारे मन्त्रालयले कसरी काम गरिरहेको छ र कस्ता विधेयकलाई प्राथमिकतामा राखिएको छ भन्ने विषयमा मन्त्री गौतमले छलफल गरेकी थिइन्।

विधायन ऐनअनुसार हरेक वर्ष असार मसान्तभित्र संघीय संसद्मा पेस गरिने विधेयकहरूको प्राथमिकतासहितको सूची तयार गर्नुपर्ने कानुनी व्यवस्था छ। यसका लागि सम्बन्धित मन्त्रालयले वार्षिक कार्यतालिकाका रूपमा विधेयकको सूची कानुन मन्त्रालयमा पेस गर्नुपर्छ। विधेयकहरू संसद्मा पुग्नुअघि ध्यान दिनुपर्ने विषय तथा कसरी जनमैत्री कानुन निर्माण गरेर सेवा–सुविधालाई चुस्त बनाउन सकिन्छ भन्नेबारे मन्त्री गौतमले छुट्टाछुट्टै छलफल गरेकी हुन्।

छलफलका क्रममा मन्त्री गौतमले बनाउनुपर्ने कानुनको मस्यौदा तयार गर्न मन्त्रालयहरूलाई अनुरोध गरेकी थिइन् । सो क्रममा मन्त्रीहरूले तयारी भइरहेको भन्दै छिट्टै विधेयकको सूची पठाउने प्रतिबद्धता जनाएका थिए।

विधेयकहरूको सूची समयमै अन्तिम गरी पठाउने तथा प्रत्येक विधेयकको स्पष्ट समयरेखा निर्धारण गर्ने विषयमा पनि छलफल भएको थियो।

विधायन ऐनको प्रभावकारी कार्यान्वयन गर्दै हतारमा कानुन निर्माण नगरी गुणस्तरीय कानुन निर्माणमा जोड दिनुपर्ने विषयमा पनि विभिन्न मन्त्रालयसँग छलफल भएको मन्त्री गौतमको सचिवालयले जनाएको छ।

मन्त्री गौतमले हतार नगरी कानुन निर्माणमा पर्याप्त गृहकार्य गर्दा कार्यान्वयन सहज हुने तथा अस्पष्ट वा परस्पर विरोधाभासी कानुनले राज्यको समय, श्रमशक्ति र स्रोतको अनावश्यक खर्च गराउनेतर्फ ध्यानाकर्षण गराइन्।

कानुन निर्माण प्रक्रियालाई प्रभावकारी, समयबद्ध र गुणस्तरीय बनाउन सम्बन्धित मन्त्रालयहरूले पूर्वतयारीलाई प्राथमिकता दिनुपर्ने बताउँदै गौतमले सरकारले लिने नयाँ नीतिसँग सम्बन्धित कानुन तर्जुमा कार्य अगाडि बढाउन मन्त्रीहरूलाई आग्रह गरेकी थिइन्।

जनभावनाअनुसार सेवा प्रवाहलाई चुस्त बनाउन आवश्यक कानुन निर्माण तथा भएका कानुनमा संशोधनका लागि विधेयक तयार गर्न अन्तर–मन्त्रालय छलफल गरिएको कानुन मन्त्रालयले जनाएको छ ।

Follow @nagarik_news