कक्षा १२ को नतिजामा उल्लेख्य सुधार, उच्च जिपिए ल्याउने अझै कम

राष्ट्रिय परीक्षा बोर्डले शुक्रबार सार्वजनिक गरेको २०८३ सालको कक्षा १२ को नतिजामा उत्तीर्ण दर उल्लेख्य रूपमा सुधार भएको देखिएको छ। यस वर्ष नियमिततर्फ ६९.७५ प्रतिशत विद्यार्थी उत्तीर्ण भएका छन्, जुन गत वर्षको तुलनामा ८.५८ प्रतिशतले बढी हो।

गत वैशाख १४ देखि २७ गतेसम्म सञ्चालन भएको परीक्षामा नियमिततर्फ कुल ३ लाख ३२ हजार २४१ विद्यार्थी सहभागी भएका थिए। तीमध्ये २ लाख ३१ हजार ७७० विद्यार्थीले सबै विषयमा ग्रेड प्राप्त गर्दै उत्तीर्ण भएका हुन्। अघिल्लो वर्ष कक्षा १२ को उत्तीर्ण दर ६१.१७ प्रतिशत रहेको थियो।