समूह ‘इ’ मा जर्मनी र आइभरी कोस्ट शीर्ष स्थानका लागि भिड्दै

काठमाडौं । शनिबार मध्यराति जर्मनीले समूह ‘इ’अन्तर्गत आइभरी कोस्टसँग शीर्ष स्थानको प्रतिस्पर्धाका लागि खेल्दैछ । खेल नेपाली समयअनुसार मध्यराति १ः४५ बजे हुनेछ ।

लगत्तै अर्को खेलमा इक्वेडर प्रतियोगिताको मेडन अनुभव लिइरहेको कुराकाओविरुद्ध जितको लयमा फर्किने लक्ष्यका साथ मैदान उत्रिनेछ । खेल आइतबार बिहान ५ः४५ बजे हुनेछ ।

जर्मनी भर्सेस आइभरी कोस्ट टोरन्टोस्थित बिएमओ फिल्डमा जर्मनी र आइभरी कोस्टबीच हुने खेल नकआउट चरणमा स्थान सुरक्षित गर्ने दौडमा निर्णायक साबित हुन सक्छ । दुबै टोलीले आफ्नो विश्वकप अभियान जितका साथ सुरुआत गरेका छन् । अहिले यी दुई तालिकाको शीर्ष दुईमा छन् । जर्मनीले प्रतियोगिताकै अहिलेसम्मको सबैभन्दा प्रभावशाली प्रदर्शन गरेको थियो । कुराकाओ ७–१ को नतिजामा पराजित भयो ।

ह्युस्टन रंगशालामा क्याराबियन टापुले चारपटकको च्याम्पियन जर्मनीविरुद्ध खेलको २१औं मिनेटमा बराबरी गोलको खुसी मनाएको थियो । मिडफिल्डर लिभानो कोमेनेन्सियाले कुराकाओका लागि ऐतिहासिक पहिलो गोल गरे । यो गोलले पाँच हजार घरेलु समर्थकबीच कुराकाओले छोटो समयका लागि भएपनि जर्मनीलाई अपसेटको आभाष दिलाएको थियो ।

त्यसअघि लिभानोअघि मिडफिल्डर फिलिक्स एनमेचाले जर्मनीलाई छैटौं मिनेटमै अग्रतामा ल्याएका थिए । फिफा वरीयतामा ८२औं स्थानमा रहेको कुराकाओ मात्र एक लाख ५० हजार जनसंख्या भएको सानो टापू हो । बराबरीको नतिजाले पनि आजको दिन विश्वकप इतिहासकै ‘बिगेस्ट अपसेट’ हुने थियो । तर, हाइड्रेसन ब्रेकले जर्मनीलाई केही फाइदा पुग्यो । जर्मनीले तुरुन्तै लय समात्यो र दोस्रो हाफमा जाँदै गर्दा ३–१ को अग्रता बनायो । स्ट्राइकर काय हाभाट्र्जले इन्जुरी समयमा पेनाल्टीमार्फत गोल गरे ।

त्यसअघि ३८औं मिनेटमा सेन्टरब्याक निको श्लोटरबेकले हेडरमार्फत कर्नर बललाई जाली चुमाउँदा जर्मनीले २–१ को अग्रता लिएको थियो । दोस्रो हाफमा अट्याकिङ मिडफिल्डर यमाल मुसियाला, लेफ्टब्याक न्याथनियल ब्राउन र वैकल्पिक खेलाडीका रुपमा मैदान प्रवेश गरेका स्ट्राइकर डेनिज उन्डभले गोल गरेपछि जर्मनी सहज जितको हकदार बन्यो ।

यसबीच जर्मनी विश्वकप इतिहासमै सबैभन्दा धेरै गोल गर्ने सूचीमा शीर्ष स्थानमा पनि उक्लियो । जर्मनीले आफ्नो गोल संख्यालाई २३९ पुर्याएको छ । जुन ब्राजिलभन्दा एक गोलले बढी हो । जर्मनीले पछिल्ला १० अन्तर्राष्ट्रिय खेलमा पराजय बेहोरेको छैन । १०मध्ये ९ खेलमा जर्मनीले कम्तिमा पनि दुई गोल गरेको छ । तर, टोलीमा डिफेन्सिभ लाइनको चिन्ता अझै छ । किनभने सन् २०१४ को फाइनल खेलयता टोलीले विश्वकपमा क्लिनसिट राख्न सकेको छैन । आइभोरी कोस्टले अघिल्ला दुई संस्करण गुमाएपछि विश्वकपमा सानदार पुनरागमन गरेको छ । अफ्रिकी टोलीका लागि इङ्लिस क्लब म्यानचेस्टर युनाइटेडका विंगर अमाद डियालोले निर्धारित समयको अन्तिम मिनेटमा निर्णायक गोल गरे । डियालो दोस्रो हाफमा वैकल्पिक खेलाडीका रुपमा मैदान प्रवेश गरेका थिए । १२ वर्षपछि आइभोरी कोस्टलाई विश्वकपमा जित दिलाउन डियालोले लेफ्ट फुटेड प्लेसमेन्टमार्फत गोलकिपर हेर्नान गालिन्डेजलाई बिट गरे । उक्त जितसँगै एमर्स फेको टोली लगातार चौथो जितको लयमा पुगेको छ ।

विश्वकपअघि फ्रान्सलाई मैत्रीपूर्ण खेलमा पराजित गरेसँगै टोलीमा आत्मविश्वास बढेको बुझ्न सकिन्छ । यही कारण अन्डरडग भए पनि आइभरी कोस्टले जर्मनीलाई चुनौती दिन सक्ने अनुमान गरिएको छ । यद्यपि इतिहास हेर्ने हो भने विश्वकपमा आइभरी कोस्टले युरोपियन टोलीहरुसँग संघर्ष गर्नुपरेको छ । चारमध्ये एक खेलमा मात्र नतिजा आइभरी कोस्टको पक्षमा आएको छ । उता जर्मनीले भने ठूलो मञ्चमा एकैपटक मात्र अफ्रिकन राष्ट्रसँग हार बेहोरेको छ । इक्वेडर भर्सेस कुराकाओ नकआउट चरणमा आफ्नो सम्भावनालाई जीवितै राख्न इक्वेडरलाई कुराकाओविरुद्ध कन्सास सिटी रंगशालामा जितबाहेक विकल्प छैन । उच्च लयका साथ इक्वेडर उत्तर अमेरिका आएको थियो । टोली करिब दुई वर्षदेखि अपराजित रहँदै आएको थियो । तर, आइभरी कोस्टविरुद्धको खेलमा इक्वेडरको १९ खेलको अपराजित यात्रा समाप्त भयो ।

यद्यपि खेलमा इक्वेडरले पर्याप्त अवसरहरु सिर्जना गरेको थियो । दक्षिण अमेरिकी टोलीले तीनपटक पोस्टमा बल प्रहार गरे पनि गोल निकाल्न सकेन । कुराकाओले जर्मनीसँग फराकिलो हार बेहोरे पनि आफ्नो डेब्यु खेलमा केही सकारात्मक संकेतहरु देखाएको थियो । डिक एड्भोकाटको टोलीले पहिलो हाफको ‘हाइड्रेसन ब्रेक’अघिसम्म जर्मनीलाई चुनौती दिएको थियो ।

यसबीच बराबरी गोल पनि सम्भव भएको थियो । तर, अन्त्यमा जर्मनीको क्वालिटी र उच्चस्तरीय खेलले फरक पार्यो । क्यारिबियन राष्ट्रले जर्मनीसँगको अनुभवबाट सिक्दै इक्वेडरविरुद्ध अझ राम्रो प्रर्दशन गर्ने लक्ष्य राखेको छ । लिभानो कोमेनेन्सिया आफ्नो गोल स्कोरिङ लयलाई निरन्तरता दिन चाहन्छन् । यद्यपि कुराकाओले जर्मनीले दृढता र संघर्ष देखाएको थियो । इक्वेडर यो खेलमा बलियो दाबेदार हुनेछ । इक्वेडरलाई थाहा छ, बराबरीको नतिजाले पनि नकआउट चरणमा पुग्ने यात्रालाई कठिन बनाउन सक्छ । त्यसैले खेल रोमाञ्चक हुने अपेक्षा गर्न सकिन्छ ।