अखिल (क्रान्तिकारी) र अनेरास्ववियूबिच एकताका लागि तीन कार्यदल गठन

काठमाडौँ । नेपाली कम्युनिस्ट पार्टी निकट विद्यार्थी सङ्गठनहरू अखिल (क्रान्तिकारी), अनेरास्ववियू लगायत एकतामा सहभागी सबै विद्यार्थी सङ्गठनहरूको संयुक्त पदाधिकारी बैठक शुक्रबार सम्पन्न भएको छ।

पार्टी एकता सम्पन्न भइसकेपछि विद्यार्थी सङ्गठनहरूको एकता प्रक्रियालाई निष्कर्षमा पुर्‍याउने उद्देश्यका साथ बसेको बैठकले सङ्गठन एकतासम्बन्धी आवश्यक तयारीका लागि तीन वटा कार्यदल गठन गर्ने निर्णय गरेको छ।

बैठकले अखिल (क्रान्तिकारी), अनेरास्ववियू तथा एकतामा सहभागी अन्य सबै विद्यार्थी सङ्गठनहरूबाट प्रतिनिधित्व हुने गरी वार्ता तथा समन्वय कार्यदल, राजनीतिक तथा शैक्षिक प्रतिवेदन लेखन कार्यदल तथा विधान मस्यौदा तयार कार्यदल गठन गरेको हो।

वार्ता तथा समन्वय कार्यदलमा विजय प्रकाश सापकोटा, मदन ढकाल, ममता अधिकारी, अभिमन्यु यादव, निरोज श्रेष्ठ, प्रकाश तामाङ, महेश श्रेष्ठ, अशोक थापा, कल्याण दाहाल, मेघनाथ चापागाईं तथा नरबहादुर कुमाल रहेका छन्।

राजनीतिक तथा शैक्षिक प्रतिवेदन लेखन कार्यदलमा देउमा जैसी “दीपा”, कृष्णबहादुर सुनार, उमेश कँडेल, प्रेम जैसी, समकृति पुन, मिलन राई, दिनेश लो, दीपक बुढाथोकी, हिमाल थापा, टेकेन्द्र मल्ल तथा नमराज विक रहेका छन्।

विधान मस्यौदा तयार कार्यदलमा अटल आचार्य, रेशम अधिकारी, विपिन पोख्रेल, शिशिर बस्याल, वीरेन्द्र जिसी, राजन शर्मा पराजुली, एल. के. राई, मनोज चन्द, कैलाश गिरि तथा लक्ष्मण विक रहेका छन्।

बैठकले गठन गरिएका कार्यदलहरूले सङ्गठन एकताका बाँकी वैचारिक, साङ्गठनिक तथा विधानसम्बन्धी कार्यलाई समयमै सम्पन्न गरी एकीकृत विद्यार्थी सङ्गठन निर्माणको प्रक्रियालाई अन्तिम टुङ्गोमा पुर्‍याउने विश्वास व्यक्त गरेको छ।