शीतलहरले जनता थुरुरु, जनप्रतिनिधि गाडीमा हुरुरु

नवलपरासीमा घाम नझुल्केको १० दिन भयो। जतिबेलै बाक्लो हुस्सु लाग्छ। शीतलहर चलेको छ। लुम्बिनी सांस्कृतिक नगरपालिका–९ का रामधलव कहारको परिवारलाई जाडोमा रात कटाउनै मुस्किल हुन्छ। कहारको परिवारमा ७ जना छन्। सबैलाई सुत्न खाट छैन। भुइँमा सुत्न बाक्लो र न्यायो कपडा पनि छैनन्। त्यसैकारण परालको चाङमाथि परिवारले रात गुजारिरहेका छन्। ‘सबैजना रातिसम्म आगो तापेर बस्छौं’, कहारले भने, ‘जसोतसो दिन गुजारिरहेका छौं।’

कहारको झिंगटीले छाएको घर छ। बारबेर गरी बनाएको झुपडीले जाडो छेक्ने कुरै भएन। आगोको सहारामा परिवारले दिन कटाइरहेको छ। पुसको अन्तिम सातादेखि तराईमा निरन्तर हुस्सु लागिरहेको छ। दिनदिनै चिसो बढ्दो छ। विपन्न र गरिब परिवारलाई दैनिकी गुजार्नै समस्या छ। स्थानीय सरकारका प्रतिनिधिहरू एसीजडित गाडीमा हुइँकिने गरे पनि गरिब र विपन्न समुदायका पीडामा भने फिटिक्कै ध्यान नदिएको गुनासो छ। केही स्थानीय तहले दाउरा बाँड्ने निर्णय गरे पनि उक्त निर्णय कागजमै सीमित छन्।