सम्पत्ति छानबिनले ‘आतंक’: ‘सबैलाई एउटै डालोमा हालेर दुःख दिने काम भयो’

सम्पत्ति छानबिन आयोगको दायरामा परेसँगै विभिन्न समयमा सार्वजनिक पद धारण गरेका व्यक्तिहरू आतंकित बनेका छन् । बालेन्द्र शाह नेतृत्वको सरकारले पहिलो चरणमा आर्थिक वर्ष २०६२/६३ सालदेखि २०८१/८२ सम्म सार्वजनिक पदधारण गरेका व्यक्तिहरूको सम्पत्ति छानबिन गर्ने निर्णयसँगै गठन गरेको छानबिन आयोगले काम थालेको छ । जंगबहादुर डाँगी नेतृत्वमा गठन भएको आयोगले सोमबारदेखि काम थालेको हो। छानबिनको दायरामा करिब ३० हजार जना पर्ने भएका छन्।

एकातिर यो कामको प्रशंसा भएको छ भने अर्कोतिर सरकारले लोकप्रियताका लागि सार्वजनिक पद धारण गरेका व्यक्ति उनीहरूका परिवारलाई आतंकित बनाउने काम गरेको गुनासो पनि सुनिन थालेको छ । आर्थिक अनियमितताको आशंका गरिएका व्यक्ति र तिनका परिवारको सम्पत्ति छानबिन गर्नुको साटो सबैलाई एउटै डालोमा हाल्ने काम सरकारले गरेको गुनासो गर्दै सरकारका एक पूर्वसचिवले भने, ‘निवृत्त भएर सामान्य जीवन बिताइरहेकालाई पनि दुःख दिन काम सरकारले गर्‍यो।’