विकट गाउँमा कफी क्रान्ति : फेरिँदै खानीखोला र महाभारतको मुहार

काभ्रे।

कुनै समय नागरिकता बनाउन जिल्ला सदरमुकाम धुलिखेल आउँदा मात्रै १५ हजार रुपैयाँभन्दा बढी खर्च गर्नुपर्ने अवस्था थियो । सडक सञ्जाल कमजोर, शिक्षा–स्वास्थ्य पहुँच टाढा, रोजगारीको अभाव र गरिबीका कारण काभ्रेको दक्षिणी भेगका खानीखोला र महाभारत गाउँपालिकाका नागरिक वर्षौंदेखि विकटताको पीडामा बाँचेका थिए ।तर, अहिले त्यही भूगोलमा कफीको हरियाली फैलिएको छ । पहाडका पाखा–पखेरामा फैलिएका कफीका बोटले केवल जमिन मात्रै हराभरा बनाएका छैनन्, स्थानीयको जीवनशैली, सोच र आर्थिक अवस्थासमेत परिवर्तन गर्न थालेका छन् । ‘गाउँमै कमाउँ, गाउँमै रमाउँ’ भन्ने नारालाई व्यवहारमै उतार्दै यी दुई पालिकाले कफी खेतीमार्फत ग्रामीण अर्थतन्त्रलाई नयाँ दिशा दिएका छन् ।