जाइकाको अर्बौंको आयोजना अपुग, लेकसाइडमा खानेपानीको चरम संकट

पोखरा। पर्यटकीय केन्द्र लेकसाइडमा चर्किएको खानेपानी अभावप्रति होटल व्यवसायीले गम्भीर चिन्ता व्यक्त गर्दै समाधानका लागि सम्बन्धित निकायको ध्यानाकर्षण गराएका छन्। होटल संघ पोखरा नेपालको एक टोली शुक्रबार नेपाल खानेपानी संस्थान, पोखरा पुगेर समस्या समाधानका लागि पहल गर्न आग्रह गरेको हो।

व्यवसायीका अनुसार पर्यटनको राजधानी मानिएको पोखराको प्रमुख पर्यटकीय क्षेत्रमा दैनिक खानेपानीको अभाव हुनु विडम्बनापूर्ण अवस्था हो। जापान अन्तर्राष्ट्रिय सहयोग नियोग (जाइका) को करिब चार अर्ब ८१ करोड रुपैयाँको लगानीमा निर्माण भएको खानेपानी आयोजना सञ्चालनमा आए पनि अपेक्षित रूपमा पानी आपूर्ति हुन नसकेको उनीहरूको गुनासो छ।