कञ्चनपुरमा गुडिरहेको मोटरसाइकलमा बाघको आक्रमण, चार जना घाइते

कञ्चनपुरमा मोटरसाइकलमा यात्रा गरिरहेका चार जना बाघको आक्रमणबाट घाइते भएका छन् । मंगलबार राति बेलडाँडी गाउँपालिका– २ स्थित दैजी–बेलडाँडी सडकखण्डमा बाघले आक्रमण गरेको हो ।

कञ्चनपुर प्रहरीका अनुसार बेलौरी नगरपालिका– ९ रतनपुर बस्ने वीरेन्द्र ठगुन्नाले सुपप्र.०१–००९ प ७६३० नम्बर मोटसाइकल चलाइरहँदा बाघले झम्टिएको हो । बाघले झम्टिएपछि भएको दुर्घटनामा ठगुन्ना, उनकी श्रीमती कल्पता, दुई वर्षीय छोरा रियान्स र १४ वर्षीय भाञ्जी आरुसी शाहु घाइते भएका छन् । घाइते तीन जनाको अवस्था मध्यम छ भने शाहु अचेत छिन् ।

जिल्ला प्रहरी कार्यालयका अनुसार घाइतेहरूको महाकाली प्रादेशिक अस्पतालमा सामान्य उपचारपछि धनगढीस्थित माया मेट्रो अस्पतालमा थप उपचार भइरहेको छ ।

प्रकाशित मिति: बुधबार, जेठ १३, २०८३

१०:४३