धुर्कोटको उत्कृष्ट कृषक पुरस्कृत

टोपलाल अर्याल

गुल्मीको धुर्कोट गाउँपालिकाले उत्पादनमा आधारित पुरस्कारमार्फत विभिन्न बिधाका कृषकलाई पुरस्कृत तथा सम्मान गरेको छ ।

कृषि तथा पशुपालन क्षेत्रमा उल्लेखनीय उत्पादन गर्दै आर्थिक विकासमा योगदान गरिरहेको उत्कृष्ट किसानलाई सम्मान गरिएको गाउँपालिकाले जनाएको छ । कार्यक्रममा विभिन्न उत्पादन विधातर्फ उत्कृष्ट कृषकलाई नगद, दोसल्ला तथा प्रमाणपत्रसहित सम्मान गरिएको छ ।

सम्मानित हुने कृषकहरुमा खाद्यान्न बाली (धान) तर्फ वडां ६ रजस्थलका विनोदकुमार श्रेष्ठ, कोदो उत्पादनतर्फ सोही वडाका डालबहादुर पछाई पुरस्कृत हुनुभएको गाउँपालिकाका प्रमुख प्रशासकीय अधिकृत रुद्र पछाईले जानकारी दिनुभयो ।

त्यस्तै वडा नं ६ रजस्थलकै उमेश घिमिरे गहुँ उत्पादनतर्फ र वडा ७ वाग्लाका तीर्थराज पन्थी मकै उत्पादनतर्फ नगदसहित पुरस्कृत हुनुभएको छ । मासु उत्पादन (खसी÷बोका) तर्फ वडा नं. २ पिपलधाराका कृष्णप्रसाद खनाल र अण्डा उत्पादनतर्फ वडा ६ रजस्थलका कृष्ण केसीलाई पुरस्कार प्रदान गरिएको प्रमुख प्रशासकीय अधिकृत पछाईले बताउनुभयो ।

कार्यक्रमकै अवसरमा १० वटाभन्दा बढी दुहुना गाई÷भैँसी पालन गरी पशुपालन क्षेत्रमा योगदान गर्ने मेघनाथ अर्याल र रविन्द्र घिमिरेलाई समेत विशेष सम्मान प्रदान गरिएको छ ।

गाउँपालिका अध्यक्ष भुपाल पोख्रेलले उत्पादनमा आधारित कृषि प्रणालीलाई प्रोत्साहन गर्दै स्थानीय किसानको मेहनत र योगदानको कदर गर्न गाउँपालिकाले बर्सेनी कृषकलाई पुरस्कृत र सम्मान गरिएको बताउनुभयो । पुरस्कार र सम्मानले कृषकलाई थप उत्साहित बनाउँदै कृषि तथा पशुपालन क्षेत्रको विकासमा सकारात्मक प्रभाव पार्ने अपेक्षा आफुहरुको रहेको पोख्रेलले बताउनुभयो ।

कार्यक्रममा गाउँपालिकाका अध्यक्ष भुपाल पोख्रेल, उपाध्यक्ष सरिता गिरी जनप्रतिनिधि, प्रमुख प्रशासकीय अधिकृत, शाखा प्रमुखहरु, प्राविधिक कर्मचारी तथा कृषकहरूको सहभागिता थियो ।