होटलहरूले पर्यटकलाई धाराको पानी दिन अस्वीकार गर्न पाउने

रोम । इटलीको सर्वोच्च अदालतले पाँचतारे होटलले ग्राहकलाई धाराको पानी दिन अस्वीकार गर्नु कानुनसम्मत रहेको फैसला गरेको छ । यो मुद्दा इटालीको डोलोमाइट्स क्षेत्रमा रहेको होटल ससोङघेरसँग सम्बन्धित छ ।

सन् २०१९ को स्की सिजनमा एक महिला पर्यटकले होटलको रेस्टुरेन्टमा धाराको पानी मागेकी थिइन् । तर वेटरले उनलाई ७ युरो मूल्य पर्ने बोतलको मिनरल वाटर मात्रै दिइरहे ।

पानी प्राकृतिक स्रोत र सार्वभौमिक मानव अधिकार भएको भन्दै महिलाले आफूलाई धारा पानी नदिइनु उपभोक्ता अधिकारविरुद्ध भएको दाबी गरेकी थिइन् । उनले मानसिक पीडा र आर्थिक क्षतिका लागि होटलविरुद्ध २ हजार ७०० युरो क्षतिपूर्ति माग्दै मुद्दा दायर गरेकी थिइन् ।

तर इटालीको सर्वोच्च अदालतले उनको माग अस्वीकार गर्दै इटालीको कानुनले होटल वा रेस्टुरेन्टलाई ग्राहकलाई निःशुल्क धारा पानी उपलब्ध गराउन बाध्य नपार्ने निर्णय सुनाएको हो । अदालतका अनुसार ग्राहकलाई धाराको पानी दिने वा नदिने निर्णय सम्बन्धित व्यवसायकै अधिकारभित्र पर्छ ।

होटल पक्षका वकिल सिल्भियो बेलार्डीका अनुसार अदालतले धाराको पानी उपलब्ध गराउनु अनिवार्य दायित्व होइन भन्ने निष्कर्ष निकालेको छ । महिलाले धाराको पानी होटल सेवाको आधारभूत हिस्सा भएको तर्क गर्दै यसलाई कोठामा ओछ्यानमा सिरक हुनु वा बाथरुममा साबुन हुनु जस्तै सामान्य सेवा भएको दाबी गरेकी थिइन् ।