बङ्गलादेशी भूमिमा अस्ट्रेलियाको पहिलो सिरिज जित, रेनश र डेविड नायक

ढाका । अस्ट्रेलियाले चटगाउँमा खेलिएको दोस्रो टी-२० खेलमा बङ्गलादेशलाई ७ रनले पराजित गरेको छ। यो जितसँगै अस्ट्रेलियाले तीन खेलको सिरिजमा २-० को अजेय अग्रता बनाएको छ।

बङ्गलादेशी भुमिमा अस्ट्रेलियाले पहिलो पटक टी-२० सिरिज जितेर इतिहास रचेको हो। यसअघि सन् २०२१ को सिरिजमा अस्ट्रेलिया बङ्गलादेशसँग ४-१ ले पराजित भएको थियो।

अस्ट्रेलियाको यो ऐतिहासिक जितका नायक म्याट रेनश बने। उनले ८९ रनको उत्कृष्ट अविजित पारी खेले। सुरुवाती छ ओभरभित्रै ३ विकेट गुमाएर संकटमा परेको अस्ट्रेलियालाई रेनश र टिम डेविडले उकासेका थिए।

उनीहरूले चौथो विकेटका लागि मात्र ५० बलमा ९७ रनको आक्रामक साझेदारी गर्दै टोलीलाई २० ओभरमा १९६/५ को बलियो स्कोरसम्म पुर्‍याए। डेविडले २६ बलमा ४५ रनको योगदान दिए।

१९७ रनको लक्ष्य पछ्याएको बङ्गलादेशले उत्कृष्ट सुरुवात गरे पनि २० ओभरमा १८९/६ रन मात्र बनाउन सक्यो। लक्ष्य पछ्याउने क्रममा बङ्गलादेशका तन्जिद हसनले आक्रामक ब्याटिङ गर्दै स्पेन्सर जोन्सनको एकै ओभरमा २२ रन समेत प्रहार गरे।

तर, चौथो ओभरमा रेनशले आफ्नै बलिङमा तन्जिदको क्याच लिएर यो साझेदारी तोडे। त्यसपछि सौम्य सरकारले तीव्र गतिमा रन जोडे पनि सातौँ ओभरमा एडम जाम्पाले उनलाई आउट गरे।

सौम्य आउट भएपछि परवेज हुसेन एमोन र सैफ हसनले बङ्गलादेशको पारी सम्हाल्दै तेस्रो विकेटका लागि ५३ रन जोडेर टोलीलाई जिततर्फ अगाडि बढाएका थिए। १३औँ ओभरमा बङ्गलादेशको स्कोर १३०/२ हुदा खेल घरेलु टोलीको नियन्त्रणमा देखिएको थियो। तर, अन्तिम ओभरहरूमा अस्ट्रेलियाका बलरहरूले कसिलो बलिङ गर्दै खेलको पासो पल्टाए।

आरोन हार्डीले २२ बलमा ३६ रन बनाएका एमोनलाई आउट गराए भने ४२ रन बनाएका सैफ हसन जोएल डेविसको शिकार बने। शमीम हुसेन पनि नाथन एलिसको बलमा आउट भए। अन्तिम ओभरहरूमा जाम्पा, एलिस र हार्डीले बङ्गलादेशी ब्याट्सम्यानहरूलाई बाउन्ड्री हान्ने कुनै मौका दिएनन्। अस्ट्रेलियाका लागि आरोन हार्डीले सबैभन्दा बढी २ विकेट लिए।

यसअघि टस हारेर पहिले ब्याटिङ गरेको अस्ट्रेलियाको सुरुवात निकै खराब थियो। जोश इङ्लिस पहिलो ओभरमै नसुम अहमदको बलमा आउट भए भने नाहिद राणाको बलमा कूपर कोनोलीलाई सैफ हसनले स्लिपमा उत्कृष्ट डाइभ हान्दै क्याच आउट गराए। मुस्ताफिजुर रहमानले मिचेल मार्श (२० रन) लाई आउट गर्दा पनि सैफले नै उत्कृष्ट क्याच लिएका थिए। पावरप्लेपछि अस्ट्रेलिया ४४/३ को कमजोर स्थितिमा थियो।

त्यसपछि मैदान प्रवेश गरेका रेनश र टिम डेविडले बङ्गलादेशी बलरहरूमाथि सिधा प्रहार गरे। डेविडले नाहिद राणा र अब्दुल गफ्फार सकलैनमाथि लगातार ठुला सटहरू खेले भने रेनशले लेग स्पिनर रिशाद हुसेनलाई निशाना बनाउँदै १३औँ ओभरमा लगातार तीन छक्का हानेर मात्र २९ बलमा आफ्नो अर्धशतक पूरा गरे।

५५ रनको स्कोरमा रेनशले जीवनदान समेत पाएका थिए, जसको फाइदा उठाउँदै उनी अन्तिमसम्म टिकिरहे। अन्तिम ओभरमा रेनश र जोएल डेविसले मुस्ताफिजुर विरुद्ध छक्का प्रहार गर्दै टोलीको स्कोर १९६ सम्म पुर्‍याए, जुन अन्ततः जितका लागि पर्याप्त साबित भयो।