आफ्नै कीर्तिमान तोड्दै सलिमले बनाए नयाँ राष्ट्रिय रेकर्ड

सुर्खेत । वीरेन्द्रनगरमा जारी ४६औँ राष्ट्रिय एथलेटिक्स प्रतियोगितामा त्रिभुवन आर्मी क्लबका खेलाडी सलिम देवानले पुरुष लङजम्पमा नयाँ राष्ट्रिय कीर्तिमान कायम गरेका छन् । उनले आफ्नै नाममा रहेको पुरानो रेकर्ड तोड्दै ७ मिटर ५८ सेन्टिमिटरको जम्प गरेका हुन् ।

देवानले यसअघि सन् २०२५ अगस्ट १० मा भारतको भुवनेश्वरमा आयोजित वर्ल्ड एथलेटिक्स कन्टिनेन्टल टुर ब्रन्च प्रतियोगितामा सात मिटर ३२ सेन्टिमिटरको जम्प गर्दै राष्ट्रिय रेकर्ड आफ्नो नाममा लेखाएका थिए । एक वर्ष नपुग्दै उनले सोही कीर्तिमानलाई २६ सेन्टिमिटरले सुधार गर्दै नयाँ इतिहास रचेका हुन् ।

४६औँ राष्ट्रिय एथलेटिक्स प्रतियोगिताका टेक्निकल डाइरेक्टर चन्द्रबहादुर गुरुङका अनुसार देवानले प्रतियोगिताको क्रममा सात मिटर ५८ सेन्टिमिटरको उत्कृष्ट जम्प गर्दै नयाँ राष्ट्रिय कीर्तिमान कायम गरेका हुन् । यो प्रदर्शनसँगै उनी नेपाली एथलेटिक्समा लङजम्प विधाका सर्वाधिक सफल खेलाडीमध्ये एकका रूपमा थप स्थापित भएका छन् ।

राष्ट्रिय प्रतियोगितामा नयाँ कीर्तिमान कायम भएपछि देवानको प्रदर्शनलाई नेपाली एथलेटिक्सको महत्वपूर्ण उपलब्धि भएको टेक्निकल डाइरेक्टर गुरुङले बताए ।

अन्तर्राष्ट्रिय प्रतियोगितामा समेत उनको प्रदर्शनबाट नेपालले थप सफलता हासिल गर्ने अपेक्षा गरिएको उनको भनाइ छ ।

#रेकर्ड

#कीर्तिमान