सेतो कोट र स्टेथेस्कोपभित्र मौलाउँदै गरेको संस्कृति !

अस्पतालको करिडोरमा सेतो कोट लगाएको चिकित्सक तथा स्वास्थ्यकर्मी देख्दा बिरामीले एउटा विशेष अनुभूति गर्छ- ‘अब मेरो उपचार गर्ने मान्छे यही हो।’ घाँटीमा झुन्डिएको स्टेथोस्कोपले त्यस पहिचानलाई अझ स्पष्ट बनाउँछ। सेतो कोट र स्टेथोस्कोप चिकित्सकको पेशागत पहिचान मात्र होइनन्, समाजले चिकित्सा पेशामाथि राखेको विश्वासका दृश्यात्मक प्रतीक पनि हुन्।

तर पछिल्लो समय एउटा दृश्य हाम्रो सामाजिक र चिकित्सकीय संस्कृतिमा अस्वाभाविक रूपमा सामान्य बन्दै गएको छ। अस्पतालमा बिरामी जाँच्ने सेतो कोट र स्टेथोस्कोपसहित चिकित्सक अस्पतालबाहिर क्याफेमा चिया पिइरहेका, रेस्टुरेन्टमा खाना खाइरहेका वा सार्वजनिक स्थानमा घुमिरहेका भेटिन्छन्। कतिपय अवस्थामा त्यही क्लिनिकल अटायरमै धूमपान गरिरहेको दृश्य पनि देखिन्छ।