१० खेलाडीमा सीमित पाराग्वेले टर्कीलाई हरायो

काठमाडौँ । फिफा विश्वकप २०२६ को समूह चरणअन्तर्गतको खेलमा टर्कीविरुद्ध पाराग्वेले १–० को जित दर्ता गरेको छ।

खेल सुरु भएको २ मिनेटमै पाराग्वेका मारियो गालार्जाले गोल गर्दै टोलीलाई अग्रता दिलाएका थिए। जोआन एनसिसोको पासमा आएको उक्त गोल नै खेलको निर्णायक क्षण बन्यो।

पहिलो हाफको इन्जुरी समयमा पाराग्वेका मिगेल अल्मिरोन रातो कार्ड पाएर मैदानबाट बाहिरिएपछि टोली १० खेलाडीमा सीमित भएको थियो। तर त्यसपछि पनि पाराग्वेले अनुशासित रक्षात्मक खेल खेल्दै अग्रता जोगाउन सफल भयो।

टर्कीले खेलभर दबाब बनाउँदै धेरै अवसर सिर्जना गर्‍यो। २७ भन्दा बढी शट प्रहार गरे पनि कुनै पनि प्रयास गोलमा परिणत हुन सकेन। अन्तिम समयसम्म बराबरी गर्ने प्रयास गरे पनि टर्की असफल रह्यो।

खेल सान फ्रान्सिस्को बे एरिया स्टेडियममा सम्पन्न भएको हो। यो नतिजाले समूह डीको अंकतालिकामा महत्वपूर्ण असर पारेको छ।